''Fənərbaxça''nın ötən mövsümün qış fasiləsində böyük ümidlərlə heyətinə qatdığı Anderson Talişkanın həm də musiqi ilə sıx bağlı olduğunu yəqin ki, bilirsiz.

"Football-plus.az" xəbər verir ki, təcrübəli braziliyalı futbolçu mövsüm bitən kimi yenə belə desək, musiqi dünyasına atılıb.

''Spark'' səhnə adı ilə tanınan Talişkanın bir müddət öncə ''Notas'' adlı yeni albom buraxdığını xəbər vermişdik. 11 mahnıdan ibarət olan və təxminən 30 dəqiqə davam edən R&B stilində olan albomun futbolçunun musiqi karyerasını yeni səviyyəyə qaldıracağı güman edilir.

Bu arada ''sambaçı'' yeni albomu ilə turneyə çıxıb. 31 yaşlı futbolçu turnenin açılışını iyunun 7-də Rio de Janeyroda edib. O, ünlü Kopakabana çimərliyinin yaxınlığında yerləşən ''Boske Bar''da səhnəyə çıxaraq heyranlarını əyləndirib. Performansı izləyicilər tərəfindən bəyənilən Talişka bu şəhərdə daha iki konsert verdikdən sonra San Pauluya keçəcək. Burda 13-19 iyunda daha 4 konsert nəzərdə tutulub. Elə Qoyaniya şəhərində də bir konsert planlaşdırılır. Sonuncu - 9-cu konsertini o yenə də Rio de Janeyroda, amma bu dəfə ''Arena Paraiso''da verəcək.

Bu turnedən sonra onun mahnılarına marağın nə dərəcədə artacağı maraqla gözlənilir. 22 iyundakı son konsertin ardından Talişkanın bir müddət istirahət edəcəyi və ''Fənər''in iyulun əvvəllərində start götürəcək yeni mövsümə hazırlıq toplanışına qatılacağı gözlənilir.

Onun qışda gəlişi ''Fənər''in çempionluğu üçün yetərli olmadı. Baxmayaraq ki, Talişka heç də pis performans sərgiləmədi və 22 rəsmi oyunda aktivinə 12 qol, 2 məhsuldar ötürmə yazdı.

''Fənər'' fanatlarının yeni mövsümdə onunla bağlı böyük ümidləri var.