''Fənərbaxça''lıların yolunu səbirsizliklə gözlədikləri Anderson Talişkanın transferi yavaş-yavaş ''sabun operası''na çevrilməkdədi. Çünki az qala hər gün bu transferlə bağlı ortaya yeni iddia atılır.

''Football-plus.az'' xəbər verir ki, təcrübəli futbolçunun bir ayağının İstanbulda olduğu düşünülərkən onunla klubu ''Əl-Nəssr'' arasında problem yaşanmışdı. Braziliyalı klubun ona olan borcunun hamısının ödənilməsini tələb etmişdi. ''Əl-Nəssr'' 15 milyon avroya yaxın olan borcu ödəmək istəməyincə Talişkanın klubunda qalmağa qərar verdiyi iddia edilmişdi.

Başqa bir iddiaya görə ''Fənər'' Talişkanın məvacibinin ''Əl-Nəssr'' ilə yarıbayarı ödənilməsini istəmiş, amma ərəblər bu təklifi geri çevirmişdi. Yəni işlər ''Fənər''in istədiyi kimi getmədiyi bir vaxtda srağagün sosial şəbəkələrdə çox maraqlı bir şəkil yayıldı. Həmin şəkildə Talişka bir məkanda ''Fənərbaxça''nın tərcüməçisi Dəniz Sarıtaç ilə söhbət edirdi!

Şəkilin Səudiyyə Ərəbistanının paytaxtı Ər-Riyadda çəkildiyi güman edilir. Bu da onu göstərir ki, ''sarı-lacivərdlilər''lə bu futbolçu arasında danışıqlar davam etdirilir. Bu arada bu gün isə Türkiyə mətbuatında artıq ''Fənər''liləri sevindirəcək xəbərlər yayılıb. ''NTV Spor'' saytının ortaya atdığı iddiaya görə 30 yaşlı futbolçu borcun ödənilməsi məsələsində ''Əl-Nəssr'' ilə olan problemini həll edib. Yəni onun İstanbula gəlişinin önündəki ən böyük maneə aradan qaldırılıb. Ona görə də Talişka son detalları razılaşdırmaq üçün yenidən ''Fənərbaxça'' rəsmiləri ilə danışıqlara başlayıb. Hətta bu transferin üzümüzə gələn həftə açıqlanmaq ehtimalı da var. Bunun həqiqət yoxsa, sadəcə növbəti bir şayiə olduğunu zaman göstərəcək.

ƏLİ