''Fənərbaxça''nın qışda böyük ümidlərlə heyətinə qatdığı Anderson Talişkanın futboldan başqa musiqi ilə də yaxından maraqlandığını və repçi kimi fəaliyyət göstərdiyini yəqinki bilirsiz.

Braziliyalı futbolçu demək olar, bütün boş vaxtını bu sahəyə həsr edir və hətta albomlar da buraxır. Səhnə adı ''Spark'' olan və indiyə qədər bir çox konsertlər verən, eləcə də ''yutub''da klipləri olan Talişka bu günlərdə sayca 3-cü studio albomunu buraxıb. ''Notas'' adlanan albom ümumilikdə 30 dəqiqə davam edən 11 mahnıdan ibarətdi.

Talişkanın bu albombla bağlı böyük ümidləri var. O, bu albomun rep sahəsində onun populyarlığını artıracağına inanır. Albom ''sambaçı''nın keçdiyi həyat yoluna, eləcə də gənclərlə münasibətlərinə həsr olunub. Mahnılar həm R&B, həm də köhnə hip hop üslubunda yazılıb. Futbolda fasilənin olduğu yay aylarında Talişkanın bir neçə konsert verəcəyi gözlənilir. Konsertlərin dəqiq tarixi yaxın müddətdə açıqlanacaq.

İddialara görə Talişka üçün musiqi futboldan da öndə gəlir. Sadəcə o, zəif imkanlı ailədə böyüdüyü üçün uşaq vaxtı musiqini yox futbolu seçməli olmuşdu. Ancaq göründüyü kimi o digər sevimli məşğuliyyətindən də əl çəkməyib. Daha öncə ''Benfika'', ''Beşiktaş'', ''Quançjou'' və ''Əl-Nəssr''də top qovmuş Talişka bir müddət öncə verdiyi açıqlamada Braziliya yığmasına çağırılacağına ümidini itirmədiyini bildirmişdi.

O, indiyə qədər ''Fənər''də forma geydiyi 16 rəsmi oyunda aktivinə 12 qol, 1 məhsuldar ötürmə yazıb.