Talişka futboldan sonra bu sahəyə yönələcək
''Fənərbaxça''nın braziliyalı ulduzu Anderson Talişka tək futbol oynamaq istedadına malik deyil.
''Football-plus.az'' xəbər verir ki, Talişka həm də rep musiqiçi kimi fəaliyyət göstərir.
Onun öz mahnıları, klipləri var və ''sambaçı'' hətta dəfələrlə konsertlər də verib. Səhnə adı ''Spark'' olan Talişka belə görünür, futbolçu karyerasını bitirdikdən sonra bütün diqqətini məhz musiqiyə yönəldəcək. Qış transfer dönəmində ''Əl-Nəssr''dən heyətə cəlb olunan və indiyə qədər İstanbul nəhəngində 12 rəsmi oyuna çıxaraq 4 qol vuran təcrübəli futbolçu bu mövzuda açıqlamalar verərək bunları deyib:
''Uşaqlıq illərimdə həyatım yalnız futbol və musiqidən ibarət idi. İlk vaxtlar musiqi mənim üçün ən azı futbol qədər dəyərli idi. Musiqiçi olmaq hər zaman arzum idi. Şükürlər olsun ki, hədəflərimə çata bilirəm. Həyatımda həm musiqi, həm də futbol arasında tarazılıq tapa bilmişəm. Mahnılarımda münasibətlərimdən, sevgidən, çətinliklərin öhdəsindən gəlməkdən, kənd və küçə həyatından bəhs edirəm. Üstəlik yaşadığım hər ölkə ilə bağlı mahnılarıma özəl şeylər qata bilirəm. Bu, mahnı bəstələməyi bir qədər də asanlaşdırır. Hələ də səsi açma, səsdən düzgün istifadə etmə ilə bağlı dərslərə gedirəm. Yəni üzərimdə çalışıram və inkişaf etməyə meyl edirəm. Futboldan sonra diqqətimi yalnız musiqiyə yönəldəcəm. Gələcəyin təməlini qoyuram. Gələcəkdə daha geniş və sağlam bir auditoriyaya sahib olacam. Bunun sayəsində bir qədər də böyüyəcəm və mükəmməl şoular, konsertlər hazırlayacam. Hər halda hədəfim məhz budu''.
Digər xəbərlər
