Misli premyer-liqasında yeni mövsümün başlanmasına cəmi üç gün qaldı.

Bilindiyi kimi, 2026/27 “futbol ili”ndə iddialı olacağı gözlənilən komandalardan biri də “Turan Tovuz”du. Əslində daha əvvəl komandanın avrokuboklara vəsiqə qazanmaq uğrunda əsasən "Sabah", "Qarabağ", "Neftçi" və "Zirə" ilə gərgin mübarizə şəraitində olacağını düşünürdük. Lakin "bozqurd"un İdarə Heyətinin sədri Ehtiram Quliyev "PeakEye Group" ilə əməkdaşlıq müqaviləsi imzaladıqdan sonra media nümayəndələrinin önünə çıxdı və çempionluq uğrunda tər tökəcəklərini elan etdi.

Xatırlayırsızsa, funksioner ötən il də belə addım atmış, yəni çempionluq iddiasını irəli sürmüş, sonda komandası 3-cü yeri tutmuşdu. Əlbəttə, hadisələrin budəfəki axarının nə ilə nəticələnəyi maraq doğurur.
Hazırda o bəllidi ki, bölgə təmsilçisinin məqsədi mövsümü konkret birinci pillədə tamamlamaqdı. Belədə xüsusən "Neftçi", "Qarabağ" və "Sabah"ı qabaqlamaq lazım gələcək ki, yetərincə çətin vəzifədən söhbət gedir.

İş ondadı ki, bu iddianın reallıqlarla uzlaşmadığını görmək üçün kollektivin mövsümlərarası fasiləni necə dəyərləndirdiyinə baxmaq kifayətdi. Düzdü, ötən mövsümün sonunda avrokuboklara vəsiqə qazanan "bozqurd" təlim-məşq toplanışına ən erkən başlayanlardan idi. Lakin UEFA-nın məlum səbəblər üzündən kollektivi Konfrans Liqasından uzaqlaşdırması bu hazırlıq mərhələsinin vaxtından əvvəl yekunlaşmasına və heyətin ölkəyə qayıtması ilə nəticələndi. Növbəti dəfə iyulun 4-də Ankaranın Qızılcahamam bölgəsində toplanışa start verən "bozqurd" birinci mərhələni burda, ikincini isə Boluda keçirdi. Türkiyə toplanışı çərçivəsində 4 yoxlama oyununda qüvvəsini sınayan tovuzlular cəmi iki qələbə qazandı. Dəqiqi, İranın U-21 yığması və Türkiyənin 1-ci liqa təmsilçisi "Fatih Karagümrük"lə oyunlar 1:1 hesablı "sülh"lə başa çatdı. Həmçinin "Turan Tovuz" "Iğdır"ı 1:0, "Gənclərbirliyi"ni isə 4:0 hesabıyla məğlub etdi. Qardaş ölkə komandalarından yalnız "Gənclərbirliyi" superliqada çıxış edir ki, ötən mövsümü 14-cü sırada başa vurublar.

Yenə də "bozqurd"un təlim-məşq toplanışının heyət üçün həqiqətən də faydalı olduğunu demək doğru olmaz. Azı ona görə ki, rəqiblər yetərincə iddialı deyil. Üstəlik "Sabah" və "Qarabağ" kimi komandalarla amansız mübarizədən sağ çıxmaq üçün daha güclü rəqiblərlə oyunlarda qüvvə sınamaq lazım idi. Ancaq bu problemi həddən artıq böyütməyə dəyməz. Çünki ilk turlar bir çox komanda üçün istənilən halda çətin olacaq.

"Turan Tovuz"da əsas çatışmazlıq heyətin keyfiyyəti və kəmiyyəti ilə bağlıdı. Bəli, həmin heyət ötən mövsümü üçüncü sırada tamamlamağa qadir oldu. Lakin rəqiblərin mövsümlərarası fasilədə daha da gücləndiyini unutmamalıyıq. Bu yöndə ən fəallardan biri də "Sabah"dı ki, artıq "bayquşlar"ın ardıcıl ikinci dəfə çempion olacağını düşünənlərin sayı artıb. Heyətini böyük ölçüdə yeniləyən "Qarabağ"dan da gözləntilər çoxdu. Azarkeşləri düşünür ki, ötən mövsüm titulsuz qalan "köhlən atlar" növbəti "futbol ili"ndə mütləq qisas alacaq. Üstəlik 90 illik yubileyini qeyd etməyə hazırlaşan "Neftçi" də çempion olmaq niyyətindədi. Konfrans Liqasında liqa mərhələsinə qədər irəliləmək istəsə də, bir mərhələ belə keçə bilməyən "ağ-qaralar", heç olmasa, premyer-liqada ümidləri doğrultmağa çalışacaq. Düzdü, paytaxt təmsilçisinin çempion olmaq ehtimalı yüksək qiymətləndirilmir. Ancaq Yuri Vernidubun rəhbərliyi altında mübarizə aparacaq komanda rəqiblər üçün başağrısı ola biləcək.

Deməli, bu şəraitdə yay "transfer pəncərəsi"ndə 4 futbolçuyla yolları ayırmaq, cəmi 5 yeni oyunçu transfer etmək sağlam strategiya deyil. Üstəlik bunlardan biri Polşanın LKS və "Radomyak" klublarında uğursuz legioner həyatı yaşayan, ardından mövsümlük hədəfə çata bilməyən "Araz-Naxçıvan"ın formasını geyən Rahil Məmmədovdu. Halbuki Ehtiram Quliyevin yuxarıda bəhs etdiyimiz tədbirdə verdiyi açıqlamadan sonra daha sanballı keçidlər gözlənilirdi.

Əvvəl alınan oyunçulara gəlincə, Aleksey Kenyaykin Sergey Samokun, 34 yaşlı (!) Stiv Beusnard isə Filip Ozobiçin yerini doldurmaq üçün alınıb. Yalnız serbiyalı müdafiəçi Filip Damyanoviçinin keçidini yüksək qiymətləndirmək olar ki, o da zəngin karyera sahibi deyil.

Belədə "Turan Tovuz"un həm təlim-məşq toplanışından, həm də heyətin komplektləşdirilməsi prosesindən səmərəli istifadə etmədiyi gün üzünə çıxır. Belə strategiyanın məhsuldar olacağını düşünmək isə klubun yalnız eyforiyaya qapılmasının nişanəsidi! 

KƏNAN BAHADIR