Bu həftə avrokuboklarda 3-cü təsnifat mərhələsinin cavab oyunları keçiriləcək. Meydana çıxacaq komandalar sırasında təmsilçiləmiz də var. Belə ki, "Sabah" Çempionlar, "Qarabağ" Konfrans Liqasında qüvvəsini sınayacaq.

Əvvəlcədən bildirək ki, "Sabah" - "Orhus" oyunu İctimai Televiziya, "Qarabağ" - "Dinamo" matçı "CBC Sport" vasitəsilə canlı yayınlanacaq. O başqa məsələ ki, "bayquşlar"ın görüşü "CBC Sport"un STS-i tərəfindən çəkiləcək.

Çempionlar Liqası
3-cü təsnifat mərhələsi, cavab oyunu
Sabah - Orhus (Danimarka) 0:0
Hakimlər: VİLLİ DELAYO, Ervan Finyan, Valentin Evrard, Erik Vattellyer (hamısı Fransa).
11 avqust. Bakı, "Bank Respublika Arena". Saat 20.00.
İlk oyun - 1:2.

Konfrans Liqası
3-cü təsnifat mərhələsi, cavab oyunu
Qarabağ - Dinamo (Kiyev, Ukrayna)
Hakimlər: STÜART ATTVELL, Yan Hussin, Nik Qrinhalq, Lyuis Smit (hamısı İngiltərə).
Bakı, Tofiq Bəhramov adına Respublika stadionu. Saat 20.00.
İlk oyun - 0:1.

Etiraf edək ki, "Sabah"dan olduğumuz qədər "Qarabağ"dan arxayın deyilik. Bəli, bu ana qədər ümidləri "köhlən atlar"ın təcrübəsini, Qurban Qurbanovun bilik və bacarıqları ilə bəsləmişik. Lakin komandanın nəinki son üç oyunda qol vura bilməməsi, hətta hücumlarda effektiv olmaması bu yöndə şanslarını xeyli azaldır. Yeni transferlər hələ də sistemə uyğunlaşmaqda çətinlik çəkir. Aparıcı futbolçulardan Elvin Cəfərquliyevin zədə təhlükəsi yaşaması, Bəhlul Mustafazadənin uzun müddətdi meydana çıxmaması, Kadi Borgesin start heyətində yerini itirəcək qədər eniş yaşaması, təkliflərin Mateuş Koxalskinin başını gicəlləndirməsi və tezliklə ağdamlılarla yollarını ayıracağı haqda iddialar, Aleksey Kaşukun qol vurmağa cəhd göstərsə də, dəqiq oynamaması, Mateus Silva və Marko Yankoviç kimi "ağır artilleriya"ların böyük ölçüdə özünə bənzəməməsi, Bədavi Hüseynovla Abdulla Zubirin xüsusən yaş məsələsinə görə əvvəlki fəallığını itirməsi, ən əsası, heyətdə yaşanan çoxsaylı ayrılıqlar və bu kimi başqa çatışmazlıqlar "Qarabağ" üçün ciddi maneələr yaradır. Rəqiblərin ötən mövsüm Çempionlar Liqasında çıxış etmiş "köhlən atlar"a qarşı xüsusi motivasiya ilə döyüşməsi isə işləri tam korlayır. Belədə ortaya təbii olaraq, ürəkağrıdıcı mənzərə çıxır. Amma "ümidlər sonda ölür" deyib irəli baxmaqdan başqa çarə yoxdu. Çünki Ağdam təmsilçisinin daha bir şansı var.

Özü də bu matç 31200 tamaşaçı tutumuna malik "Tofiq Bəhramov" da keçiriləcək. Yəni azı 30 min azarkeşin stadiona gəlmək, "Qarabağ"ı final fitinə qədər dəstəkləmək şansı var. Qurban Qurbanov və komandası isə etimadı doğrultmağa, tərəfdarların stadionu xoşbəxt, gülərüz tərk etməsinə vəsilə olmağa borcludu!

Oyunöncəsi mətbuat konfranslarının və media nümayəndələri üçün açıq məşqlərin də vaxtı bəllidi. Qurban Qurbanovun mətbuat konfransı sabah saat 13.30-da “Azersun Arena”da başlayacaq. Saat 18.45-da isə ağdamlıların media nümayəndələri üçün açıq məşqi (ilk 15 dəqiqə) eyni arenada keçiriləcək.
Qonaqların baş məşqçisi İqor Kostyukun Tofiq Bəhramov adına Respublika stadionunda keçiriləcək mətbuat konfransı saat 17.00-da start götürəcək. “Dinamo”nun ilk 15 dəqiqəsi media üçün açıq olacaq məşqi 17.30-da başlayacaq.

KƏNAN BAHADIR