Dağıdıcı zəlzələdən bəri 10 gün ərzində Türkiyə ərazisində heç bir rəsmi futbol qarşılaşması keçirilməmişdi. 11-ci gündə Trabzonda bu həsrətə son qoyuldu. Bu qarşılaşmadan öncə Türkiyə futbol tarixində daha öncə heç vaxt baş verməyən olaylar yaşandı. Zəlzələ bütün sahədə olduğu kimi, futbolda da insanları birləşdirməyi bacarıb....

“Trabzonspor” rəhbərliyi əldə olunacaq gəlir yardım fonduna köçürüləcəyi üçün hamıya, hətta akrreditasiyalı jurnalistlərə də biletləri pulla satmış, eləcə də başqa klubların fanatlarını və prezidentlərini matça dəvət etmişdi. Oyun günü 4 nəhəng klubun fanatlarının Trabzonun görməli yerlərini gəzib birlikdə şəkil çəkdirmələri ortaya gözəl görüntülər çıxarmışdı. Federasiya prezidenti Mehmet Büyükekşi başda olmaqla, “Fənərbaxça”, “Qalatasaray”, “İstanbul BŞ” və başqa klubların prezidentləri oyunu izləmək üçün Trabzona gəlmişdilər.

Bundan başqa, yardıma dəstək olmaq üçün “Fənərbaxça”, “Qalatasaray”, “İstanbul BŞ” 1000, “Beşiktaş” isə 1903 xatirə bileti almışdı. Trabzonlu fanatlar mərkəzi tribunada zəlzələyə aid möhtəşəm bir xoreoqrafiya hazırlamışdılar. Orda Azərbaycan da daxil olmaqla Türkiyəyə yardın edən bir çox ölkənin bayrağı təsvir olunmuşdu. Fanatlar matçın ilk dəqiqələrində səssiz qaldılar və yalnız 04.17-dən (zəlzələnin başlama saatı) sonra təzahüratlar səsləndirməyə başladılar. Eləcə də hər iki klub razılaşmışdı ki, qol sevinci olmayacaq.
Belə bir gündə və belə bir qarşılaşmada “Trabzonspor”un qalib gəlməməyə haqqı yox idi.

Türkiyə çempionu çətinliklə də olsa, ümidləri doğrultmağı bacardı. Matçın böyük bölümündə rəqibdən üstün oynayan Trabzon təmsilçisi minimal hesabla qalib gəldi. 65-ci dəqiqədə Trezeqenin baş zərbəsini qapıçı dəf etsə də , özünü yetirən danimarkalı Strüger Larsen topu tora göndərdi. Qoldan sonra trabzonlu oyunçular Türkiyə bayrağını açdılar. Cavab oyunu gələn həftə - fevralın 23-də keçiriləcək.

pley-off, ilk oyun
Trabzonspor – Bazel (İsveçrə) 1:0
Strüger Larsen, 65.
Trabzonspor: Uğurcan Çakır, Peres (Bartra, 72), Uqo, Densvil, Ərən Elmalı (Strüger Larsen, 46), Siopis (Umut Bozok, 85), Doğucan Haspolat, Bakasetas, Abdülkadir Ömür (Yusuf Yazıcı, 90+1), Trezeqe, Qomes.

Oyundan sonra

Abdulla Avcı, “Trabzonspor”un baş məşqçisi:

“Bütün ölkənin mənəvi dəstəyini hiss etdik. Bu axşam bütün Türkiyənin komandası “Trabzonspor” oldu. Tribunalarda Türkiyənin, “Fənərbaxça”nın, “Qalatasaray”ın, “Beşiktaş”ın, başqa klubların bayraqlarını görmək xoş idi. Qol vurmaq üçün 5-6 real fürsətimiz oldu. Qapımız önündə isə yalnız bir dəfə ciddi təhlükə yarandı. Əvvəldən sona qədər oyun planımıza sadiq qaldıq. Cüzi də olsa, üstünlük qazandıq. Qalib gəlməklə insanlarımızın üzünü az da olsa, güldürə bildiksə, bu, bizim üçün böyük məna daşıyır. Bura gələn bütün başqanlara, fanatlara təşəkkür edirəm. Ümid edirəm ki, bu dostluq və bərabərlik daha da güclənəcək.

Bu hələ başlanğıcdı. Yaralarımızı bu şəkildə sağaldacağıq. İnanıram ki, səfərdən də istədiyimiz nəticə ilə qayıdacağıq və sonrakı püşkatmada da iştirak edəcəyik. Avrokuboklarda 4 klubla yola davam etmək çox önəmlidi. “Fənərbaxça” ilə “İstanbul BŞ” bu mövsüm mühüm işlər gördü. Biz və “Sivasspor” da əlimizdən gələni edirik”.

Hayko Fogel, “Bazel”in idman direktoru:

“Əslində bu gün 90 dəqiqəyə sığmayan bir qarşılaşma oynadıq. Hər iki komandanın oyuna yaxşı köklənmədiyi hiss olunurdu. Matçdan öncə də demişdim ki, sadəcə, oynamaq məcburiyyətində qaldığımız üçün meydana çıxırıq. Oynadıq və bitti. “Trabzonspor”un öz meydanında yaxşı oynadığını bilirdik. Bunu bir daha göstərdilər. Zatən bu mövsüm evdə heç kimə yenilməmişdilər. Digər klublar kimi bizi də burdan əliboş yola saldılar. Evə məğlubiyyətlə qayıtmaq istəməzdik. Amma cavab oyununda bunun əvəzini çıxmağa çalışacağıq”.