Srağagün Türkiyə kubokunda 1/4 final mərhələsinin püşkü atıldı.

Football-plus.az xəbər verir ki, tədbir “Turkuvaz Media Mərkəzi”ndə keçirildi. Burda yenə “Qalatasaray” rəsmilərindən heç kimin olmaması diqqəti çəkdi.

İstanbul nəhəngi oktyabrın sonlarından, daha dəqiq desək, oktyabrın 23-də keçirilən “Qalatasaray” – “Alanyaspor” matçından (2:2) bəri faktiki Türkiyə Futbol Federasiyasını boykot edir. Klub həmin oyundakı hakimlik üzündən federasiyanın tədbirlərinə, eləcə də Klublar Birliyinin toplantılarına nümayəndə göndərmir.

Bu boykotun mövsümün sonuna qədər davam edəcəyi gözlənilir. Futbolsevərlər bu püşkün nəticəsini böyük maraqla gözləyirdi. Çünki ölkənin iki nəhəng camiəsinin - “Qalatasaray”la “Fənərbaxça”nın bir-birinə rəqib olması ehtimalı var idi. Daha dəqiq desək, “Sivasspor”, “İstanbul BŞ”, “Trabzonspor” və “Fənərbaxça” “səpələnmişlər”, “Kayserispor”, “Qaziantep”, “Ankaragücü” və “Qalatasaray” isə “səpələnməmişlər” arasında yer almışdı. Amma bu baxımdan püşk ümidləri doğrultmadı. 1/4 finalda yaranmış cütlər bunlardı: Fənərbaxça – Kayserispor, Qalatasaray – İstanbul BŞ, Ankaragücü – Trabzonspor, Sivasspor – Qaziantep. Bu mərhələdə də qalib bir oyunda bəlli olacaq və oyunlar adı birinci göstərilən komandaların meydanında keçiriləcək. Yarımfinalda isə artıq qalib ev-səfər prinsipi ilə müəyyənləşəcək. 1/4 final qarşılaşmaları 28 fevral – 2 mart tarixlərində oynanılacaq. “Qalatasaray” – “İstanbul BŞ” cütünə marağı artıran amil odu ki, “Cim-Bom” bu mövsüm superliqada bu rəqibi 7 cavabsız qolla darmadağın edib. Özü də səfərdə. Sözsüz, Əmrə Belözoğlunun komandası qısas almağa çalışacaq. “Fənərbaxça” – “Kayserispor” duelində də intriqa var. Belə ki, turnirin son finalçısı statusunda olan Kayseri təmsilçisi ötən mövsüm 1/8 finalda minimal hesabla qalib gələrək məhz “Fənər”i mübarizədən kənarlaşdırmışdı. Özü də Kadıköydə! Yeri gəlmişkən, artıq yarimfinalda rəqib olmaq ehtimalı olan komandalar da bəllidi. Belə ki, “Fənərbaxça” – “Kayerispor” cütünün qalibi “Sivasspor” – “Qaziantep”, “Qalatasaray” – “İstanbul BŞ” cütünün qalibi isə “Ankaragücü” – “Trabzonspor” cütünün qalibi ilə oynayacaq. Göründüyü kimi, əzəli rəqiblərin burda da qarşılaşmaq ehtimalı yoxdu. Amma əvəzində “Qalatasaray” – “Trabzonspor” duelini izləyə bilərik. “Qalatasaray”la “Fənərbaxça” ən yaxşı halda finalda üz-üzə gələcək. Bu isə o deməkdi ki, ortaya maraqlı bir təqvim çıxır.

Çünki bu komandalar superliqada sondan əvvəlki - 37-ci turda qarşılaşacaq. Həmin oyun mayın 21-də keçiriləcək. Nəhənglər kubokda həlledici matça qədər irəliləsələr və federasiya ötən il olduğu kimi kubokun finalını mayın sonlarına salsa, biz bir həftə ərzində “Qalatasaray”la “Fənərbaxça”nın iki duelinə şahidlik edə bilərik! Amma digər tərəfdən Türkiyədə mayın 14-nə salınan prezident seçkisi buna mane ola bilər. Seçkinin taleyi 2-ci turda həll olunsa, çox güman, superliqa çərçivəsindəki derbi təxirə salınacaq.