Azərbaycan yığması dünya çempionatında iştirak etməsə də, bizim üçün sevindirici bir məqam var: Misli premyer-liqasının orda təmsilçisi olacaq.

Əlbəttə, söhbət “Turan Tovuz”un mərkəz müdafiəçisi Roderik Millerdən gedir. “Sabah”ın özbəkistanlı yarımmüdafiəçisi Umarali Raxmonaliyev də mundiala yollanmağa çox yaxın idi. Özbəkistan yığmasının baş məşqçisi Fabio Kannavaro onu əvvəlcə 40, ardından 30 nəfərlik siyahıya salsa da, 26 futbolçunun yer aldığı yekun siyahıdan sildi.
Millerə gəlincə, Panama yığmasının baş məşqçisi Tomas Kristiansen DÇ-yə hazırlıq çərçivəsində Braziliya ilə yoldaşlıq oyununda (2:6) ona son 25 dəqiqədə şans verdi. Həmin vaxt isə oyunun taleyi artıq həll olunmuşdu, hesab 5:1 idi. Azərbaycan çempionatının mundialdakı yeganə təmsilçisi ilə müsahibəni təqdim edirik.

- Roderik, səni karyeranda ilk dəfə dünya çempionatına qatılmağın münasibəti ilə təbrik edirik. Hansı hissləri keçirirsən? Bizim üçün maraqlıdı: ümumiyyətlə, futbola başlayanda nə vaxtsa dünya çempionatında oynamağı arzulayırdınmı?
- Çox sağ olun. Bu, karyeramın ən vacib anlarından biridi. Uşaqlıqdan bəri dünya çempionatında oynamaq və ölkəmi futbolun ən böyük səhnəsində təmsil etmək arzusundaydım. Oynamağa başlayanda televiziyada dünya çempionatına baxırdım və bir gün orda olacağımı təsəvvür edirdim. Artıq bu arzum gerçəkləşib, sadəcə, qürur duyuram.

- Mundialda Panama yığması ilə yanaşı, həm də “Turan Tovuz”u təmsil edəcəksən. Klub prezidenti Ehtiram Quliyevin sənə ünvanladığı təbrik mesajını görmüşük. Bəs komanda yoldaşların bu xəbəri necə qarşıladı? Sən bu xəbəri görəndə necə reaksiya verdin? Sevincini ilk növbədə kimlə bölüşdün?
- Komanda yoldaşlarımdan, məşqçilər heyətindən və klubdakı hər kəsdən çoxlu təbrik aldım. Prezident Ehtiram Quliyevin mesajını da gördüm və bu, məni çox sevindirdi. Klubun dəstəyini hiss etmək mənim üçün çox şey ifadə edir. Xoş xəbəri ilk paylaşdığım adamlar ailə üzvlərim oldu, çünki onlar karyeramın hər anında məni dəstəkləyib.

- Bildiyimizə görə, DÇ-2018-ə yollanmaq şansın da olub, sadəcə, zədə üzündən alınmayıb.
- Bəli, çox çətin an idi. Həmin dünya çempionatında olmaq üçün çox çalışdım, təəssüf ki, zədə ən pis vaxtda gəldi. Lakin heç vaxt inanmaqdan əl çəkmədim və işləməyə davam etdim. Buna görə də bu çağırışın mənim üçün xüsusi mənası var. Əzmkarlığın və illərlə çəkilən zəhmətin mükafatını aldım.

- Çempionlar Liqasında oynamaq daha nüfuzludu, yoxsa dünya çemionatında?
- Bunlar fərqli turnirlərdi və hər biri böyük nüfuza malikdi. Çempionlar Liqası dünyanın ən yaxşı klublarını bir araya gətirir, dünya çempionatı isə istənilən futbolçu üçün ən vacib turnirdi, çünki hər kəs öz ölkəsini təmsil edir. Mənim üçün dünya çempionatında oynamaq unikal və çox xüsusi bir hadisədi.

- Statistikaya baxanda Panama yığmasının seçmə turnirdə keçirdiyi 10 oyunun heç birində uduzmadığını gördük. Bu uğur nəyin sayəsində mümkün oldu?
- Əsas məsələ komandanın birliyi, məşqçi heyətinin işi və bütün proses boyunca inkişaf etdirdiyimiz özünəinam idi. Təcrübəli oyunçularımız və istedadlı gənc futbolçularımız var. Hər kəs öz rolunu başa düşür və eyni hədəfə doğru addımlayırdı.

- Turnirdə əsas heyətdə yer alacağına inanırsanmı?
- Mənim işim mümkün qədər ən yaxşı şəkildə hazırlaşmaq və məşqçi mənə ehtiyac duyduğu anda hazır olmaqdı. Son qərar həmişə baş məşqçinindi. İstər start heyətində, istərsə də sonradan meydana çıxmağımdan asılı olmayaraq, ən vacib məqam komandaya kömək etməkdi.

- Baş məşqçin Tomas Kristiansen də Kurban Berdıyev kimi üç mərkəz müdafiəçili sistemlə oynayır. Bunu sənin üçün əlavə üstünlük saymaq olarmı?
- Bəli, saymaq olar. Çünki mən bu sistemə öyrəşmişəm. Tələblərini yaxşı bilirəm və bu, mənə tez uyğunlaşmağa kömək edir. Bununla belə, hər bir milli komandanın öz oyun tərzi var və həmişə fərqlər olur.

- Roderik, bir məqam da diqqətimizi çəkdi: seçmə mərhələ oyunlarında, demək olar ki, meydana çıxmamısan. Bunun səbəbi nədi?
- İştirakımı məhdudlaşdıran bəzi hallar, o cümlədən texniki qərarlar və prosesin özü ilə bağlı vəziyyətlər oldu. Bununla belə, mən həmişə milli komandaya sadiq qaldım, çox çalışmağa davam etdim və komandaya kömək edə biləcəyimi göstərmək üçün əlimə düşən hər fürsətdən yararlandım.

- İngiltərə, Xorvatiya və Qananın da yer aldığı qrupda Panamanın hədəfi nə olacaq?
- Bilirik ki, çox çətin qrupa düşmüşük. Çünki güclü milli komandalarla qarşılaşacağıq. İlk məqsədimiz hər matçda mübarizə aparmaq və Panamanı qürurla təmsil etmək olacaq. Bundan sonra xal qazanmaq və növbəti mərhələyə yüksəlmək üçün çalışacağıq. Futbolda komanda özünə inananda və vahid orqanizm kimi çalışanda hər şey mümkündü.