Qrinvud da ''Fənər''ə keçməyə razılıq verdi - Əziz Yıldırımın rəqibi şou göstərir!
''Fənərbaxça'' camiəsində böyük səbirsizliklə gözlənilən həftəsonu gəlib çatdı.
Bu gün və sabah İstanbul nəhəngində prezident seçkiləri keçiriləcək. Əziz Yıldırımın rəqibi Hakan Safi fanatları coşdurmaqda davam edir.
Daha öncə ''Sportinq''in forvardı Luis Suares və Türkiyə yığması, ''Əl-Əhli''nin müdafiəçisi Merih Dəmiral ilə anlaşdığını bildirən Safi son açıqlamasında daha bir ''bomba partladıb''. O, ingiltərəli vinger Meyson Qrinvud ilə anlaşdığını bildirib:
''Qrinvud ilə dördillik anlaşma əldə etmişik. Çox yaxşı futbolçudu. Əla statistik göstəricilərə malikdi və artıq özünü Avropa futbolunda sübut edib. Karyerasının bəlkə də ən yaxşı illərində ''Fənərbaxça''mıza gəlməyə razılıq verib. Ulduz oyunçular gətirəcəyimizə söz vermişdim. Verdiyim sözün üzərində durmağın qürurunu yaşayıram. Dəyərli dostum Paolo Maldini də burda olmalı idi. Bir az ayağında problem var. Futbol oynadığı dönəmdən qalan bir problem ola bilər (gülür). Onunla birlikdə gələcəyin ''Fənərbaxça''sını qururuq''.
''Mançester Yunayted''in yetirməsi olan, bir mövsüm ''Xetafe''də də top qovan Qrinvud 2024-dən bu yana ''Marsel''in şərəfini qoruyur. O, son mövsümü 45 oyun 26 qol, 8 məhsuldar ötürmə göstəriləri ilə tamamlayıb.
İddialara inansaq, Hakan Çalhanoğlu ilə Robert Levandovski də Hakan Safinin anlaşmağa yaxın olduğu digər ulduzlardı. Safi transferlər üçün 250 milyon avro büdcə ayırdığını da əlavə edib!
Digər xəbərlər
