Məlum olduğu kimi, "Qarabağ" 2026/27 mövsümü üçün daha güclü heyət formalaşdırmaq istəyir.

Heç şübhəsiz, bunda bütün imkanlardan, ələ düşən fürsətlərdən maksimum yararlanaraq "qızıl dubl"a imza atan "Sabah" böyük pay sahibidi. Odu ki, uzun müddət sonra ilk dəfə mövsümü titulsuz başa vuran ağdamlılar növbəti dəfə eyni aqibətlə üzləşmək istəmir. Masazır təmsilçisinin ölkə kubokunu qazanmasından sonra ölkəmizi Avropa Liqasında təmsil edəcəyi dəqiqləşən "köhlən atlar" artıq heyətlə bağlı önəmli işlər görüb. "Futbol+" indiyə qədər "Qarabağ"ın Toral Bayramov, Emmanuel Addai, Ramil Şeydayev və Sami Mmae ilə yolları ayırdığını, Zakaria Savo və Jali Muaddibi transfer etdiyini xəbər verib. Əlbəttə, vitse-çempionun transfer planları bununla yekunlaşmayacaq. Çünki bu gün nəinki yerli, xarici mətbuatda da "köhlən atlar"la adı hallanan xeyli futbolçu var. Bu sırada diqqətiçəkən adlardan biri də Martin Zlomisliçdi. "Germanijak" nəşrinin məlumatına görə, ağdamlılar bu qapıçını transfer etməyə yaxındı. "Qarabağ" Xorvatiya "Riyeka"sının şərəfini qoruyan bosniyalı qolkiperə görə klubuna 500 min avro (təxminən 987 min manat) ödəyəcək. Çünki onun klubuyla müqaviləsinin müddəti 2027-ci ilin yayında başa çatacaq və "Riyeka" bu müddəti daha bir il uzatmaq imkanına malikdi. Tərəflərin "əlcək sahibi"nin keçidi üçün bir çox məsələlərdə razılaşdığı vurğulanıb. Maraq üçün qeyd edək ki, Zlomisliç Bosniya və Hersoqovina millisinin üzvüdü, bu yığmanın dünya çempionatı üçün heyətində yer alıb. Futbolçu Bosniyanın U-19 və U-21 milli komandalarında da iş başında olub. Qapıçı 2021-ci ildən "Riyeka"nın formasını geyir. 2017-21-ci illərdə ölkəsində - "Şiroki Brieq"də oynayan qolkiper peşəkar karyerasına 19 yaşında məhz bu klubda başlayıb. Avqustda 28 yaşını tamamlayacaq Zlomisliç 189 sm boya malikdi. Onun "Transfermarkt"dakı qiyməti 2 milyon avrodu. Qapıçı Xorvatiya çempionatında 2025/26 mövsümünü qənaətbəxş keçirib. 33 matçda meydanda olan qolkiper 11 oyunda qapını toxunulmaz saxlayıb, qalan görüşlərdə 36 qol buraxıb. "Əlcək sahibi" bu yarışda cəmi 1 dəfə sarı vərəqə ilə cəzalandırılıb. Həmçinin Zlomisliç "Riyeka"nın heyətində Çempionlar Liqasının təsnifat, Avropa Liqasının təsnifat və pley-off, Konfrans Liqasının isə əsas mərhələsində forma geyib. O, komandasıyla birgə bu turnirin 1/16 final mərhələsinə qədər irəliləyib. Qapıçının Bosniya millisinin DÇ-2026-nın pley-offunda İtaliya və Uelsə qarşı keçirdiyi matçlarda ehtiyat oyunçular skamyasında yer aldığını da bildirək.
Amma Zlomisliç "Qarabağ"a gəlsə, komandadakı qapıçıların sayı 4-ə çatacaq. Belədə gənc Amin Ramazanovla xorvatiyalı Fabian Buntiçin mövqe uğrunda mübarizəsi daha da çətinləşəcək. Maraqlıdı ki, bu ərəfədə Buntiçin "köhlən atlar"dan ayrılmayacağı, 2027-ci ilin yayına, yəni müqavilə müddətinin sonuna qədər komandada qalacağı haqda xəbərlər yayılıb. Polşalı Mateuş Koxalskinin “taxt-tacını laxlatmaq” isə hələ ki çətin məsələ kimi görünür. Deyəsən, bizi çox maraqlı rəqabət gözləyir. Bu gün o bəllidi ki, Zlomisliç azı Buntiçi qabaqlaya bilmək üçün əlindən gələni əsirgəməyəcək.
KƏNAN BAHADIR