''Trabzonspor'' ümidləri doğrulda bilmədi və Türkiyə futbolu 27 illik fasilədən sonra acı reallığı qəbul etməli oldu.

Türkiyə çempionu Çempionlar Liqasının pley-off mərhələsində səfərdə 1:2 hesabı ilə məğlub olduğu ''Kopenhagen''in müqavimətini öz meydanında qıra bilmədi. Möhtəşəm azarkeş dəstəyi altında oynamasına qaradənizlilər rəqib qapısına heç cür yol tapa bilmədilər və görüş qolsuz başa çatdı. Daha öncə ÇL-in 2-ci təsnifat mərhələsində ''Fənərbaxça'' da Kiyev ''Dinamo''suna məğlub olmuşdu.

Bu da o deməkdi ki, ÇL tarixində 3-cü, son 27 ildə isə 1-ci dəfə Avropanın ən mötəbər klub turnirinin qrup mərhələsində Türkiyə təmsilçisi olmayacaq! Daha öncə buna 1992/93 və 1995/96 mövsümlərində rast gəlinmişdi. 5 mövsümdə - 1997/98, 2000/01, 2001/02, 2003/04 və 2007/08-də Türkiyə futbolu qrup mərhələsində 2 komanda ilə təmsil olunub. Ümumilikdə indiyə qədər Türkiyəni ÇL-in qrupunda ''Qalatasaray'' 15, ''Beşiktaş'' 8, ''Fənərbaxça'' 6, ''Trabzonspor'', ''İstanbul BŞ'' və ''Bursaspor'' hərəyə 1 dəfə təmsil edib. Abdulla Avcı məşqçi karyerasında ikinci dəfə ÇL-in biraddımlığında uğursuzluğa düçar oldu.

Daha öncə 2017-nin avqustunda onun çalışdırdığı ''İstanbul BŞ'' ÇL-in pley-offunda ''Sevilya'' ilə mübarizədən məğlub ayrılmışdı (evdə 1:2, səfərdə 2:2). Ümumiyyətlə Abdulla Avcının kollektivləri avrokuboklarda ilk oyunda məğlub olduğu 5 halın hamısında mübarizəni dayandırmalı olub! Daha bir diqqətçəkən məqam odu ki, ''Trabzonspor'' avrokuboklarda Avcının dönəmində keçirdiyi 6 oyunun heç birində qalib gələ bilməyib (3 heç-heçə, 3 məğlubiyyət).