Türkiyə futbolu tarixinin ən bahalı transferi olan Viktor Osimhenlə bağlı yeni xəbərlər var.

''Qalatasaray'' ''Napoli''yə bu transfer üzündən olan borcunun son hissəsini - 17,5 milyon avronu dünən gecikdirmədən ödədi. Beləliklə, ''Qalatasaray'' rəhbərliyi üzərinə düşən öhdəliyi yerinə yetirərək Neapol klubunun hesabına son 8 ayda 80 milyon avro keçirmiş oldu!

Bu məbləğin 75 milyon avrosu təzminat, 5 milyon avrosu isə bonuslardı. Bununla həm də iki klub arasında münasibətlər möhkəmlənmiş oldu. Çünki ''Napoli'' rəhbərliyi qarşı tərəfin bu məbləği gecikdirəcəyindən çəkinirdi. Digər məsələ isə daim aktuallığını qoruyan Osimhenin Avropa nəhənglərindən birinə transfer olunması məsələsidi.

Məlum olduğu kimi Nigeriya yığmasının çalışdırıcısı Erik Şell bir neçə gün öncə verdiyi açıqlamada Osimhenin yığmaya çağırılmamasının səbəbi kimi onun başqa klublarla danışıqlar aparmasını göstərmişdi. Düzdü, ulduz futbolçu bu faktı təkzib edərək məşqçisinin yanlış anlaşıldığını bildirmişdi.

Əslində əvvəlcə ''Çelsi'', sonra da ''Mançester Yunayted'' həqiqətən də nigeriyalı forvardın şərtləri ilə yaxından maraqlanıblar. Ancaq Osimhenin 21 milyon avroya bərabər olan illik maaşı onları geri addım atmağa vadar edib. Üstəlik 150 milyon avroluq təzminat da var. ''Qalatasaray'' göz bəbəyini bundan aşağı məbləğə satmağı planlaşdırmır. Ona görə də İngiltərə nəhəngləri hələ ki, gözləmə mövqeyindədi və indiyə qədər heç bir klub rəsmi şəkildə ''Cim-Bom''un qapısını döyməyib.

27 yaşlı futbolçu Türkiyədə ikinci mövsümünü tamamladı. O, ötən mövsümü 33 oyun, 22 qol, 8 məhsuldar ötürmə göstəriciləri ilə bitirdi.