Mahir Emrelinin "Kayzerslautern"də də xoşagəlməz durumla üzləşdiyindən xəbərdarsız.

Gələn ayın 1-də 29 yaşını tamamlayacaq futbolçu "Nürnberq"də yaşadığı bəxtsizlikdən sonra keçdiyi digər 2-ci bundesliqa klubunda da - şans qazanmaq baxımından uğursuzluğa düçar oldu.

Xatırladaq ki, hücumçu çempionatda mümkün 34 oyunun yalnız 12-də şans qazandı. Mahir bunların 3-də start heyətində yer aldısa, qalanlarında sonradan meydana çıxdı. Bu rəqəmlərin uğurlu mövsüm baxımından yetərsizliyi öz yerində, Emreli həm də cəmi 366 dəqiqə meydanda oldu. Bununla yanaşı, o, yalnız bir qola imza ata bildi.

Həmvətənimizin Almaniya kuboku qarşılaşmalarında da üzü gülmədi. Yalnız ilk mərhələdə forma geyən futbolçuya 90 dəqiqə tər tökməsinə, bu oyunda qol vurmasına rəğmən, növbəti görüşlərdə güvənilmədi. Bütün bunlardan sonra Mahirin yayda icarəyə veriləcəyi haqda xəbərlər yayıldı. Hətta sabiq klublarının - "Nürnberq"lə "Legiya"nın onu yenidən heyətində görmək istədiyi haqda bilgilər ortaya çıxdı.

Ancaq "Bild"in bu mövzu haqda dərc etdiyi son informasiya hadisələrin fərqli məcrada cərəyan edə biləcəyini göstərir. Belə ki, almaniyalı həmkarlarımız "Kayzerslautern"in Mahiri heyətdə saxlamaqda maraqlı olduğunu bildirib. Buna səbəb isə "qırmızı iblislər"in yayda bir çox oyunçu ilə yollarını ayıracağıdı. Bu sırada klubun öz istəyi ilə vidalaşdığı futbolçular da var, sərfəli təkliflərə görə başqa komandalara üz tutanlar da.

Düzdü, "Bild" bu yöndə daha çox məlumat əldə edə bilməyib. Lakin "Kicker"in iddiasına görə, Daniel Hanslik, Kenni-Prins Redondo, Florian Kleynhansl, Avdo Spahiç, Norman Basette, Paul Coli, Ci-Su Kim, Atanas Şernev və Simon Simoni heyətdən ayrılacaq. Maraq üçün bildirək ki, Hanslik mərkəz hücumçusudu. Uzun müddətə sıradan çıxan mərkəz hücumçusu İvan Prtayinin isə komandada qalıb-qalmayacağı hələ dəqiq deyil. Bütün bu məqamlar "qırmızı iblislər"in Mahirlə bağlı qərarını yenidən götür-qoy etməsiylə nəticələnib.

Kəsəsi, hazırda Mahirin yayda "Kayzerslautern"i tərk etmək ehtimalı azdı. Yenə də hadisələrin axarının nə ilə nəticələnəcəyini görmək üçün gözləmək lazımdı. Ümid edək ki, hər şey Emreli üçün xeyirli olacaq. İndi əsas fikirlər millimizin çıxışına yönəlib. Böyük ehtimalla, qarşıdakı günlərdə bütün suallara cavab tapılacaq.

Yeri gəlmişkən, "Transfermarkt" hücumçunun transfer dəyərini yeniləyib. Belə ki, Mahirin dəyəri 100 min avro azalaraq 600 min avroya (təxminən 1,19 milyon manat) düşüb.

Xatırladaq ki, hücumçunun "qırmızı iblislər"lə müqaviləsinin müddəti 2028-ci ilin yayında başa çatacaq.

KƏNAN BAHADIR