Ötən ilin sentyabrında karyerasını başa vurduğunu açıqlayan Arda Turan ilə bağlı Türkiyə mətbuatında maraqlı xəbər peyda olub.

''TRT Spor''un iddiasına görə Türkiyənin gənclər yığmasının yeni baş məşqçisi məhz 35 yaşlı Arda olacaq və bu təyinat qarşıdakı günlərdə rəsmən açıqlanacaq.

Baş məşqçi olmaq arzusunu tez-tez dilə gətirən Arda son aylarda Türkiyə Futbol Federasiyasının A və B lisenziyalı məşqçilik kurslarına qatılmışdı. Qardaş ölkənin U-21 yığmasını 2020-dən bu yana Tolunay Kafkas çalışdırırdı. Amma təcrübəli mütəxəssis uğursuz nəticələrə görə bu yaxınlarda istefaya göndərilmişdi.

Xatırladaq ki, karyerası ərzində ''Qalatasaray'', ''Barselona'', ''İstanbul BŞ'' kimi klublarda top qovmuş və bir çox önəmli titullar qazanmış Turan Türkiyə yığmasında isə 100 keçirib və 16 qol vurub.