FİFA dünya çempionatı ərəfəsində daha bir qadağaya əl atıb. Növbəti məhdudiyyət azarkeşlərdə narazılıq yaradıb.

FİFA stadion qaydalarını dəyişib və azarkeşlər üçün vacib məhdudiyyət tətbiq edib. Qurumun rəsmi saytının yaydığı xəbərə görə, yenilənmiş Davranış Məcəlləsinə əsasən, stadionlara təkrar istifadə oluna bilən və ya boş su butulkalarının gətirilməsi qadağan olunub. Əvvəllər 1 litrə qədər boş plastik butulkaya icazə verilirdisə, indi bu maddə tam ləğv edilib.

FİFA qərarı təhlükəsizlik səbəbləri ilə izah edib. Bildirilib ki, butulkaların tribunaya və ya meydana atılması risk yarada bilər.

Beləliklə, azarkeşlər öz butulkalarını stadiona gətirə bilməyəcəklər. Su arenanın daxilində satışda olacaq. Bəzi stadionlarda sudoldurma və sərinləmə zonaları nəzərdə tutulur.

FİFA-nın yeni qadağası ciddi narazılığa səbəb olub. Turnirin startına bir həftə qalmış verilən qərar xüsusilə isti hava gözlənilən şəhərlərdə ciddi müzakirə doğurub. Azarkeşlər həm qiymət artımından, həm də rahatlığın azalmasından narahatdılar.