“Bizim üçün çətin mövsüm oldu. Son turlara qədər “Eqnatiya” favorit sayılmırdı. Komandamız hətta üçüncü pilləyə enmişdi. Ancaq sonda toparlandıq, ardıcıl qələbələr qazandıq, həm də iki əsas rəqibimiz üzərində. Ondan sonra çempionluq asanlaşdı”.

“Əslində mövsümə yetərincə yaxşı başlamışdım. Həm çempionatda, həm də avrokuboklarda sabit şəkildə oynayırdım. Ancaq sonradan nəsə baş verdi. Heç özüm də bilmədim nə oldu. Təxminən üç ay meydana az çıxdım. Futbolda belə şeylər olur. Həmin vaxt günahı özümdə axtardım. Qış fasiləsindən sonra start heyətində yerimi qaytardım. Daim əsas heyətdə oynamağa başladım”.

“Açığını desəm, çağrılmayacağıma əmin idim. Ona görə ki, yığmadan heç kim mənlə əlaqə saxlamayıb, durumumla maraqlanmayıb. Əvvəllər də demişəm, sonuncu dəfə Fernando Santuş yığmanın “sükanı arxasında” olarkən mənlə əlaqə saxlayıblar. Hətta yığmaya çağrılmadığım dönəmdə də müntəzəm əlaqə saxlayır, işlərimin necə getdiyi ilə maraqlanırdılar. Düşərgədə olub-olmamağıma baxmayaraq, həmişə yığmanı dəstəkləyirəm. Komandanın qarşıdalı oyunlarda qələbə qazanacağına, bizi və xalqımızı sevindirəcəyinə ümid edirəm”.

“Eqnatiya” ilə indiki müqaviləm daha bir il qüvvədə olacaq. Və demək olar ki, dincəlməyə vaxtımız yoxdu. Təxminən bir həftə sonra komanda üzvləri yenidən bir araya gələcək, Çempionlar Liqasında təsnifat mərhələsinin oyunlarına hazırlaşacaq. Mən də həmin oyunlarda heyətdə olacam. Hələ ki bütün diqqətim ÇL çərçivəsində qarşıdakı oyunlara yönəlib, transfer məsələləri ilə agentim məşğul olur. Zamanla nəyin necə olacağını görəcəyik”.