Yanvarın 13-də Antalyada qış hazırlığını davam etdirən “Qarabağ” dünən ilk yoxlama matçında “Rakuv”la qarşılaşıb və məğlub olub.

Polşalılar meydandan 3:0 hesablı qələbə ilə ayrılıb.

Oyun yoxlama xarakterli idi deyə Qurban Qurbanov meydana eksperimental heyət buraxmışdı. İlk “11-liy”ə baxıb düşünmək olardı ki, 51 yaşlı mütəxəssis nəyisə sınayır.

Qapıda Aminin oynaması futbolçunun ümidlənməsi yönündə atılmış addım idi. Müdafiənin mərkəzində Bəhlul və Bədavinin, solunda Elvinin, sağında Markonun yer alması “Gent”lə oyuna hazırlıq idi. Julionun Yankoviçlə yarımmüdafiənin dayağında çıxış etməsi hər iki transfer üçün yaxşı mesaj idi. Çünki Qara ilə Riçardın yaşı artıb. Yeni transferlər onları rahat şəkildə əvəz edə bilərlər. Andrade Ağdam klubunun yeni pleymeykeri ola bilər. Qurban Qurbanov ona böyük ümid bəsləyir. Məhz bu səbəbdən o, dünənki oyunda əsas heyətdə yer almışdı. Zubir, Ramil, Musa “üçlüy”ü Kadi və Ovusunun gedişindən sonra hücum xəttini təşkil edəcək. Qurban Qurbanov bu qarşılaşmada özünə lazım olan qeydləri apardı. Amini çıxsaq, 2023-cü ildəki “Qarabağ”ın özəyini dünən ilk “11-lik”də yer alan futbolçular təşkil edəcək. Növbəti matçlarda və mövsüm ərzində komanda bu istiqamətdə təkmilləşəcək.

Ağdam təmsilçisi yenilənməyə çalışır. “Rakuv” isə ələ düşən fürsətləri lazımınca dəyərləndirdi. Birinci və ikinci qolların hər iki hissənin əvvəlində vurulması narahatedici məqamdı. Lakin Qurban Qurbanov Antalya toplanışında bu problemləri həll etməyə çalışacaq. İkinci yarı isə baş məşqçinin gələcək üçün starategiyasının göstəricisi idi. David, İbrahim, Rəhim və Nərimanın oynaması onlar üçün böyük şans idi. Bu futbolçular komandanın 3-4 il sonrakı ulduzları ola bilərlər.
Oyun haqda isə çox danışmaq lazım deyil. Yenə qeyd edək ki, yoxlama xarakterli matç idi. Qurbanov 2-ci hissədə heyətdə çoxlu dəyişiklik etdi. Komandada yorğunluq və hazırlıqsızlıq hiss olunur. Zamanla bu problem həll olunacaq. Qapıçıların səhvləri də çoxdu. Oyunboyu 3-4 epizodda Luka ilə müdafiəçilər anlaşa bilmədilər. Yeni transfer Diakabinin özünə gəlməsinə hələ çox var. 6 aydan çox futbolsuz qalan fransalı özünü çox yaxşı göstərə bilmədi.

Bəlkə də Qurban bəy bu oyuna əsasən özü üçün hansısa nəticələr çıxardı. Lakin Azərbaycan çempionunun yoxlama matçında olsa da belə, 0:3 uduzması düşündürücü məqamdı.

İLKİN SULTANLI