Bu gün Çempionlar Liqasının pley-off mərhələsinin cavab matçında "Viktoriya" (Plzen) "Qarabağ"la qarşılaşacaq.

Görüşün başlamasına saatlar qalıb. Görəsən, təmsilçimiz hansı heyətlə çexlərin qarşısına çıxacaq?

Qurban Qurbanov Plzendəki matçda Bakıdakı görüşdən fərqli heyətdən istifadə edə bilər. Sözsüz, qapıda Şahruddin Məhəmmədəliyev yer alacaq. Müdafiənin solunda Toral Bayramov, mərkəzdə Bəhlul Mustafayevlə Bədavi Hüseynov, sağda isə Marko Veşoviçə şans veriləcək. Yarımmüdaifənin dayaq hissəsində Riçard Almeyda ilə Marko Yankoviç çıxış edə bilər. İlk oyunda gördük ki, Qara Qarayev hücumların təşkilində o qədər də fəal iştirak etmir. Bu məqamı nəzərə alan Qurban Qurbanov vitse-kapitanı ehtiyatda saxlasa, buna təəccüblənmərik. Abdualla Zubir həmişə kimi sol cinahda vingerlik edəcək. İlk oyunda ehtiyatda qalan Filip Ozobiçin bu dəfə əsas heyətdə yer almaq şansı da böyükdü. Kadi Borges isə sağ cinahda “ağalıq etməlidi”. Bakıdakı qarşılaşmada “Qarabağ” bu mövqedə hücumların qurulmasında axsayırdı. Məhz bu səbəbdən braziliyalı yarımmüdafiəçi burda Ramili, Ozobiç isə mərkəzdə Kadini əvəzləyə bilər. Hücumun sivri ucunda İbrahima Vaci yer alacaq. Qurban Qurbanovun ilk görüşdə başqa, cavab matçında fərqli sxemdən istifadə etdiyinin cari mövsümdə dəfələrlə şahidi olmuşuq.

İLKİN SULTANLI