Payız bitdi, 2022-ci il qurtardı. Qış gəldi, qar yağdı. Üzü yaza doğru gedirik. Bir-iki gün öncə hardasa oxudum ki, Novruz çərşənbələrin də vaxtı bəllidi.

Yəni ölkədə hər şey qaydasındadı. Hamı yeni ildə bütün çətinliklərin öhdəsindən gəlmək üçün nəsə edir. Amma “Kəpəz”dəki boran-tufan bitmir. Yenə Əfran İsmayılov, Rauf Əliyev və Elvin Yunuszadə medianın gündəmindən düşmür. Bütün saytlar onlardan açıqlama, müsahibə alır. Futbolçular da deyir ki, heç yerə getmirik, müqavilə müddətinin sonuna kimi burdayıq. Ya da pulumuzun hamısını versinlər, gedək. Əcəb dövrandı. Bəzən yaşlılar deyir ki, zəmanəyə lənət, ölkədə hər şey pisə doğru gedir. Amma vallah, gözəl dövrdə yaşayırıq. Ağlı və bacarığı olanlar çox yaxşı yaşayır.

Qayıdaq məsələyə. “Kəpəz” Tərlan Əhmədovun istəmədiyi futbolçuların əlində qalıb. Düzdü, iki futbolçu ilə yollar ayrıldı. Söhbət Əli Səmədovla Zahid Mərdanovdan gedir. Onlar özünə klub tapdı, bundan sonra “Şamaxı”nın uğurları üçün çalışacaqlar. Qaldı Əfran, Rauf və Elvin. Hücumçu deyirdi ki, “şirlər”lə razılaşsam, ayrılacam. Lakin bu izdivac baş tutmadı. Rauf indi də deyir ki, qalıram “Kəpəz”də, maaşımı qəpiyinə kimi alacam. Gəlin, əvvəlcə bir məqama baxaq. Adamlar haqlıdı. Əllərində sənəd – müqavilə var. Bu səbəbdən də haqlarını tələb edirlər. Amma belə? Əfran dünən saytların birinə açıqlama verib ki, mövsümün sonunda karyeramı bitirəcəm. Əla qərardı. Amma bunu uzatmağın nə adı var? Alma 5 aylıq maaşını, 2-3 ayı istə və get. Amma ortada prinsip məsələsi var. Düşünürəm ki, Əfran da, Rauf da, elə Elvin də onlara problem yaradan baş məşqçiyə problem yaratmaq istəyir. Tərlan Əhmədov heyəti yeniləməyə çalışır. Bunun üçün pul lazımdı. Pul da bu “üçlüy”ün maaşına gedir. Sponsor da yoxdu ki, 3 milyondan artıq maliyyə xərclənsin. Ona görə rəhbərlik də girinc qalıb. Anlaşılmaz heç nə yoxdu. Tərlan Əhmədov onları istəmir, futbolçular da sözləşmələrinə uyğun pullarını tələb edir. Bu prosesləri birləşdirəndə görürük ki, tək problemli tərəf elə klub rəhbərliyidi. Niyə? Gəlin, izah edim.

Yadınıza gəlirsə, Mahir Emreli ilə “Legiya” arasında problem yaşananda bir neçə araşdırma yazısını diqqətinizə çatdırmışdım. Milli üzvünün Varşava təmsilçisindən canını necə qurtara biləcəyi ilə bağlı məqamları təqdim etmişdim. Klub Mahirin təhlükəsizliyini təmin edə bilməmişdi, Varşava təmsilçisi informasiyanın mediaya çıxmasının qarşısını almamışdı. Hücumçu da bundan istifadə edərək ayrılmaq istəyirdi. Sonra qarşılıqlı razılıq əsasında Polşa klubunu tərk etdi.

Qayıdaq yenə öz məsələmizə. Yuxarıda qeyd etdiyim kimi, indi ağıl və bacarıq zamanıdı. Bunlar kimdə varsa, uğur əldə edir. Görünür, “Kəpəz” rəhbərliyi belə məsələlərdə səriştəsizdi. Söhbət birmənalı şəkildə İlqar Nadiridən gedir. Görəsən, “Kəpəz”in daxili nizam-intizam məcəlləsi var? Yəni rəhbərlik futbolçularla müqavilə bağlanarkən menecerlərinə və ya özlərinə deyib ki, komanda daxilində yaşanan problemləri mediaya açıqlamaq olmaz? Bununla bağlı anlaşma var? Düşünürəm ki, yoxdu. Çünki olsaydı, “Kəpəz” bundan istifadə edərək rahat şəkildə həm Rauf, həm Əfran, həm də Elvin ilə yolları ayıra bilərdi.

Görünən kəndə nə bələdçi? Köklü futbol tarixinə sahib olan klub qalıb şəriştəsiz idarəçinin əlində. Ağıllı və bacarıqlı adamlar – Rauf, Elvin də Əfran da bundan istifadə edərək Gəncə futbolunu barmağına dolayır.

İLKİN SULTANLI