Bu gün "Qarabağ" Çempionlar Liqasının 3-cü təsnifat mərhələsinin cavab matçında Macarıstanda "Ferentsvaroş"la qarşılaşacaq.

Bakıdakı oyundan sonra növbəti mərhələyə kimin adlayacağı ilə bağlı fikir söyləmək o qədər də asan deyil. Komandaların şansı bərabərdi. Düzdü, bukmeker kontorları meydan sahiblərini daha üstün sayır. Lakin bu, nəticəyə təsir edən məqam deyil. “Qarabağ” ilk oyunda əsas futbolçularından istifadə edə bilməmişdi. Qurban Qurbanov Kadi Borges, Riçard Almeyda, Kevin Medina və Maksim Medvedevin xidmətindən məhrum idi. Cavab görüşündə isə braziliyalı ilə millimizin üzvü meydanda olacaq. Kevinlə Maksim zədə səbəbindən Macarıstana aparılmayıb. Bu da “Qarabağ” üçün problem ola bilər. İlk matçda gördük ki, hər iki futbolçunun yoxluğunda “köhlən atlar” müdafiədə boşluqlar verir. Qurban Qurbanov yəqin bugünkü oyunda sxematik dəyişiklik etməyəcək. O, həmişə tətbiq etdiyi oyun üslubundan istifadə edəcək.

Qapıda Şahruddin Məhəmmədəliyev yer alacaq. Müdafiənin solunda Toral Bayramov, mərkəzdə Bədavi Hüseynovla Bəhlul Mustafazadə, sağda isə Marko Veşoviç çıxış edəcək. Riçard Almeyda ilə Marko Yankoviç dayaqda mübarizə aparacaq. Abdulla Zubir sol, Kvabena Ovusu isə sağ cinahda vingerlik edəcək. Yarımmüdafiənin mərkəzində Kadi Borges hücumların qurulmasında iştirak edəcəksə, “Qarabağ”ın yeganə qol ümidi İbrahima Vaci olacaq. İstənilən halda, bu təxmini heyətdi. Meydana çıxanlar barədə yekun qərarı Qurban Qurbanov verəcək. Meydan sahiblərində isə hansısa ciddi itki yoxdu. Stanislav Çerçesov sərəncamında olan futbolçuların hamısının xidmətindən yararlana biləcək.

İLKİN SULTANLI