Valensiyanın müqavilə məsələsi nə yerdədi?
“Fənərbaxça”da gələcək taleyi bəlli olmayan oyunçuların başında Enner Valensiya gəlir.
“Football-plus.az” xəbər verir ki, karyerasının ən yaxşı mövsümünü keçirən təcrübəli ekvadorlu forvardın müqavilə müddəti bu yay bitir. Onunla hələ də yeni müqavilə imzalanmayıb. Bu arada Valensiyanın meneceri Qonsalo Varqas danışıqlar prosesi ilə bağlı türkiyəli həmkarlarımıza məlumat verərək bunları deyib:
“Mümkün variantlar arasında Valensiyanın “Fənərbaxça”da qalmaq ehtimalı da var. Yəni müqaviləni yeniləməyimiz mümkündü. Enner İstanbulda xoşbəxtdi və bu klubda özünü göstərməyi bacarıb. Ona görə də burda qalmağın əleyhinə deyil. Komandada ən sevilən futbolçulardandı. Tələsmədən, sakit şəkildə danışıqları davam etdiririk. Müqavilənin elə detalları var ki, orda hər iki tərəf mütləq razılığa gəlməlidi. Ən yaxşı qərarı vermək üçün bu ayın sonuna qədər gözləyəcəyik. Masanın üzərindəki təkliflər arasından ən yaxşısını seçəcəyik. Valensiya buna layiqdi”.
33 yaşlı futbolçu Braziliya və Səudiyyə Ərəbistanı klublarından sərfəli təkliflər alıb. Bir klubun ona ümumilikdə 12-13 milyon avroluq maaş olmaqla üçillik müqavilə təklif etdiyi deyilir. Valensiya da bunu əlində bayraq edərək “Fənər”dən illik 3 milyon avro maaş olmaqla üçillik müqavilə tələb edir. Amma oyunçunun yaşını nəzərə alan rəhbərlik ekvadorlu ilə maksimum “1+1“ illik müqavilə imzalamaq istəyir. Danışıqlar prosesinin ayın sonuna qədər yekunlaşacağı gözlənilir.
Qeyd edək ki, son 4 turda qol vura bilməməsinə baxmayaraq, Valensiya tarixi bir mövsüm keçirir. O, 27-si superliqada olmaqla 2022/23-də 43 rəsmi oyuna çıxıb, 31 qol vurub. Bombardirlər yarışında 2-ci pillədəki “Fatih Karagümrük”lü Fabio Borininin hesabında 19 qol olduğunu nəzərə alsaq, böyük ehtimalla Valensiya bu mövsüm bombardir olacaq. “Fənər”in bu baxımdan həsrəti başa çatacaq. Sonuncu dəfə superliqada bombardir olan “Fənər”li futbolçu 2010/11-də 28 qolla Aleks De Souzadı. Klub tarixində bu günə qədər 15 futbolçu bombardir adını qazanıb. Amma onlardan yalnız 4-ü bunu 20-dən çox qol vurmaqla edib. Valensiya Aykut Kocaman (1991/92 25 qol, 1994/95 27, 1988/89 29), Tanju Çolak (1992/93 27), Bülənt Uyğun (1993/94 22) və Aleksdən sonra bunu bacaran 5-ci futbolçu olacaq. Valensiya toparlanaraq qalan 3 oyunda ən azı 3 qol vuracağı təqdirdə adını klubun tarixinə yazdıracaq. Çünki “Fənər”in tarixində ən azı 30 qolla bombardir olan futbolçu olmayıb! Bu baxımdan rekord 1988/89-da 29 qol vuran Aykut Kocamana aiddi. 31 qola çatacağı təqdirdə isə Valensiya adını Türkiyə çempionatının tarixinə də yazdıra bilər. Onun bu turnirdə bir mövsümə ən çox qol vuran əcnəbi futbolçuya çevrilmək üçün gözəl şansı var. Bu göstəricidə rekord 2018/19-da “Kasımpaşa” və “Qalatasaray”ın heyətində ümumilikdə 30 qol vuran Mbaye Dianyeyə məxsusdu. Valensiyanın indiyə qədər “Fənərbaxça”da 111 rəsmi oyunda 57 qol, 16 məhsuldar ötürməlik performans sərgilədyini də bildirək.
Digər xəbərlər
