Ötən mövsüm “Neftçi”nin ən dəyərli oyunçularından olan Freddi Varqasın məsələsi ilə bağlı düyünlər yavaş-yavaş çözülməkdədi.

Düzdü, venesuelalı vinger “ağ-qaralar”ın Sloveniya toplanışına qatılmadı, yoxlama oyunlarına çıxmadı. Bununla belə, onun karyerasını məhz “Neftçi”də davam etdirmək istəyi şübhə doğurmur. Varqasın hədəfinə çatmaq üçün hətta məxsus olduğu Nataniya “Makkabi”sinin məşqlərini boykot etdiyi də məlumdu. İsrail klubu onun transferi üçün “Neftçi”dən 900 min avro istəyirdi.

“Düyünlər çözülməkdədi” ifadəsinin altında yatan məna isə başqadı. Varqas hazırda Bakıdadı. Sadəcə, “Makkabi”nin bəzi sənədləri göndərməsi qalır ki, keçid rəsmiləşsin, venesuelalı futbolçunun adı “ağ-qaralar”ın Konfrans Liqası üçün iştirak ərizəsinə salınsın.

“Neftçi”nin fanat səhifəsi də bu mövzuda maraqlı xəbər yayıb:

“Neftçi”nin uzun müddətdi danışıq apardığı, anlaşmaya yaxın olduğu yarımmüdafiəçi Freddi Varqas hələ ki sözünün üstündə durur. Venesuelalı oyunçu “Neftçi”də oynamaq üçün Ukrayna, Polşa, Norveç, Yunanıstan, Çexiya kimi ölkələrdən gələn təklifləri rədd edib.

İddia olunur ki, Varqas üçün hətta klubuna bizim satınalma maddəmizdə olan 900 min və üzərində təkliflər belə olub. "Makkabi" klubu təkliflərə isti yanaşsa da, Freddi hələ də bu ölkələrdən heç birində oynamaq istəmədiyini bildirib.

Xatırladaq ki, ötən mövsüm "Neftçi"də 5 qol, 10 assist ilə oynamış 10 nömrənin maaşı 30 min dollar civarında idi. Yeni şərtlərlə isə Freddi 35-40 min arası aylıq əməkhaqqı üçün razılıq verib. Hələ də "Makkabi" və "Neftçi" arasında danışıqlar davam edir. Artıq bugünlərdə rəhbərlik Netaniya klubuna son təklifini verib”.

İSRAYIL XEYRULLAYEV