Bu həftə avrokuboklarda 2-ci təsnifat mərhələsinin ilk oyunları keçriləcək.

Təbii ki, ölkə klublarının matçlarına da şahidlik edəcəyik. Məlum olduğu kimi, “Sabah” Çempionlar, “Qarabağ” Avropa, “Zirə” Konfrans Liqasının ilk təsnifat mərhələsində hərəyə iki qələbə qazanmaqla bizi sevindirdi. İndi həmin uğurların davamını istəyirik. Ancaq “Neftçi”nin də yarışda olduğunu unutmamalıyıq. Axı ikiillik fasilədən sonra Konfrans Liqasına vəsiqə qazanan paytaxt təmsilçisinin hədəfləri böyükdü.

Əvvəldən bildirək ki, “Sabah”ın matçı İctimai Televiziyada, “Qarabağ”la “Neftçi”nin oyunu “CBC Sport”da, “Zirə”nin qarşılaşması isə “İdman” TV-də yayınlanacaq.

Çempionlar Liqası
2-ci təsnifat mərhələsi, ilk oyun
Sabah – KuPS (Finlandiya)
Hakimlər: LUKAŞ KUJMA, Yakub Vinkler, Pyotr Podbyelski, Marçin Şerboviç (hamısı Polşa).
21 iyul. Bakı, “Bank Respublika Arena”. Saat 20.00.

ÇL-ə yaxşı başlayan “Sabah” yola davam edir. İlk təsnifat mərhələsində 4 qol vuran, birini buraxan komanda bu dəfə daha ciddi uğura imza atmaq niyyətindədi. Hər halda, baş məşqçi Valdas Dambrauskas məhz bunu arzulayır. Komandada hansısa problemdən söhbət gedə bilməz. “Bayquşlar”, demək olar ki, istənilən cəhətdən yaxşı səviyyədədi. İndi həmin hazırlıq səviyyəsini meydana daşımaq lazımdı ki, bu baxımdan da çatışmazlıq hiss olunmamalıdı. Komanda “doğma divarlar” arasında parlaq qələbə qazanmalıdı. Masazır təmsilçisi bu yolla həm azarkeşlərinə növbəti xoşbəxtliyi yaşada, həm də növbəti mərhələnini qapısını aralaya bilər.

Avropa Liqası
2-ci təsnifat mərhələsi, ilk oyun
Qarabağ – ÇSKA (Bolqarıstan)
Hakimlər: DANİEL ÇİFFİ, Covanni Baççini, Alessandro Lo Çiçero, Daniel Perenzoni (hamısı İtaliya).
23 iyul. Bakı, Tofiq Bəhramov adına Respublika stadionu. Saat 20.00.

Öz aramızdı, yenilənmiş “Qarabağ” hələ ki bizi ötən mövsümlərdəki “Qarabağ”ı axtarmağa məcbur qoymayıb. İlk matçları böyükhesablı qələbələrlə başa vuran “köhlən atlar” özünü yaxşı tərəfdən göstərir. Bəli, “Vestri”nin səviyyəsi və gücü ilə bağlı məqamlar bu yöndə əmin danışmağa böyük ölçüdə mane olur. Ancaq mövcud vəziyyət başqa düşüncələrə də yer qoymur. Qurban Qurbanovun komandasına inam böyükdü. Ağdamlıların etimadı doğrultmaq üçün əlindən gələni əsirgəməyəcəyi də bəllidi. Üstəlik bu mərhələdəki rəqib də “Qarabağ”ın “dişinə görədi”. Bu üzdən gözləntiləri bir qədər də artırmaq olar! Görək ağdamlılar zəfər yürüşünü davam etdirə biləcək, ya yox...

Konfrans Liqası
2-ci təsnifat mərhələsi, ilk oyun
Neftçi – Dinamo-Minsk (Belarus)
Hakimlər: KONSTANTİNOS FELLAS, Marios Kaloqirou, Giorgios Xaralampus, Konstantinos Neofytou (hamısı Bakı).
22 iyul. Bakı, “Palms Sports Arena”. Saat 20.00.

“Neftçi”nin baş məşqçisi Yuri Vernidub komandanın cari durumundan, hazırlıq prosesindən o qədər razılıq edir ki, hər kəs “Dinamo-Minsk”lə oyunlarda komandadan qələbələr gözləyir. Ukraynalı mütəxəssis özü də bu mərhələdə uğur qazanacaqlarına inanır. Kəsəsi, ikiillik fasilədən sonra avrokuboklara vəsiqə qazanan “ağ-qaralar”ın düşərgəsində xoş əhval-ruhiyyə hökm sürür. Bizə qalan iş isə komandanın kefinə soğan doğranmamasını arzulamaqdı. Hər halda, paytaxt təmsilçisi uzun müddətdi uğursuzluğun dadını unudub və indi çempionluq, liqa mərhələsi həvəsiylə yaşayır.

Payde (Estoniya) – Zirə
Hakimlər: ROMAN JİTARİ, Viktor Mardari, Andrey Bodean, Andrey Brequta (Moldova).
23 iyul. Parnu, “Parnu Rannastadion”. Saat 20.00.

“Torpedo”nun meydanında böyükhesablı qələbə qazanan “Zirə” ardıcıl ikinci səfər matçına çıxacaq. Gürcüstanın futbol ictimaiyyətinə şok yaşadan “qartallar”ın bu dəfə də uğurlu nəticə qazanacağına inananlar çoxdu. Niyə də yox?! “Torpedo” ilə matçlar komandanın fiziki durumunun yetərincə yüksək səviyyədə olduğunu ortaya qoydu. Həmin qələbələrin yaxşılaşdırdığı psixoloji vəziyyəti də nəzərə alsaq, “Zirə”yə mane olacaq nəsə yoxdu. Odu ki, təmsilçimizdən qələbə gözləməyə haqqımız çatır. Axı həm də heyətdə nə zədəli, nə də cəzalı var.

Bu arada 1500 yerlik “Parnu Rannastadion”da keçiriləcək qarşılaşmada “qartallar”a dəstək göstərmək vacibdi! Rəqib “Zirə”yə 70 yer ayırıb. Güman edək ki, təmsilçimiz “Torpedo” səfərində olduğu kimi azarkeşsiz qalmayacaq. “Zirə”nin Estoniyaya bu gün saat 14.00-da yollanıb. Komanda çarter reysi ilə Tallinə uçub. Burdan isə avtobusla stadiona yola düşəcək. Sabah baş məşqçi Rəşad Sadıqovun iştirakı ilə keçiriləcək mətbuat konfransı Bakı vaxtı ilə saat 19.30-da, oyunöncəsi son məşq isə saat 20.00-da start götürəcək.

KƏNAN BAHADIR