“Əvvəlcə onu bildirim ki, komanda Polşa və Yunanıstanla matçlardan öncə normal hazırlıq keçmişdi. Özüm bunun şahidi olmuşam. Polşa ilə matçda komandanın “milliləşdirilən” futzalçıları heç də xoş təsir bağışlamadı. Sanki formada deyildilər. Polşa isə əksinə, bu qarşılaşamaya ciddi hazırlaşmışdı və nəticəsini də gördü. Ümumiyyətlə, bizim polyaklarla oyunumuz alınmır. Həm futzalda, həm də böyük futbolda onlara qarşı çətinlik çəkirik. Polşanın oyununda məşqçi işi görünürdü. Yığmanın braziliyalıları təkbətək mübarizələrin heç birində rəqib futzalçıları keçə bilmədi. Onlardan fərqli azərbaycanlı futzalçılar daha xoş tətəsir bağışladı. Hiss olunurdu ki, meydan sahibləri qrup birincisi olmaq istəyir. İstədiklərinə də gözəl oyunla nail oldular. Ən diqqət çəkən nüans Polşa yığmasının heyətində bir nəfərin də kənardan dəvət olunmaması idi. Onlar sübut etdi ki, yerlilərlə də nəticə qazanmaq mümkündü. Komanda elit-raunda vəsiqə qazanıb. Ona görə də yığmanı, baş məşqçini çox sərt tənqid etmək düzgün deyil. Ancaq bu o demək deyil ki, Alesionu tənqid etmək olmaz. Onun da səhvləri var idi. Birəbirdə zəif olduğumuzu qeyd etdim. Ara ötürmələri də istənilən səviyyədə deyildi. Əsas ümidim standart vəziyyətlərə idi. Təəssüf ki, rəqib buna da imkan vermədi. Qarşı tərəf yığmanın oyun sistemini əla təhlil etmişdi. Güclü və zəif tərəfləri bilirdilər. Belə oyunla elit-raundda işimiz daha çətin olacaq.

Qarşılaşmanın keçirildiyi zalda da mükəmməl ab-hava var idi. Meydan sahibləri azarkeşlərinin güclü dəstəyi ilə ortaya mükəmməl oyun qoydu”.