"İnsidentin əsasını birbaşa rəqib komanda qoydu. Oyunun startından ünvanımıza söyüşlər yağdırmağa başladılar. "Qobustan" rəsmisi Talehin ağzından oyunboyu söyüş əskik olmadı. Hakimlər də buna məhəl qoymadı. Onlar obyektivliyi pozmaqla insidenti daha da qızışdırdılar. 1 metrlik ofsayd vəziyyətindən qapımıza qol vurulur, laysman bayrağı qaldırmır. Rəqib topa əllə oynayır, amma baş hakim Tural İbrahimov bunu də görməzdən gəlir. Ümumiyyətlə, oyunda hakimlikdən söhbət belə gedə bilməz. Fasilə ərəfəsində Taleh hakimə yaxınlaşıb deyir ki, sən bizim lehimizə az cərimə zərbəsi verirsən. Referi də cavabında “bayaqdan elə sizin xeyrinizə qərarlar vermişəm” deyir. Biz də arxadan gələrək bunların hamısını eşidirik. Bəzi media nümayəndələri haqqımıza girərək bizi ara qarışdıran komanda kimi təqdim edir. Belə deyil. Dünən yaradılan klub deyilik. Neftçala hələ SSRİ dönəmindən komandası olan rayondu. Müstəqillik dönəmində də iki dəfə elitaya vəsiqə qazanmış və çıxış etmişik. Tarixi, ənənəsi olan klubuq. Heç vaxt da dava-şava yaradan, rəqiblərimizə, hakimlərə və digər rəsmi şəxslərə hörmətsizlik etməklə ad çıxarmamışıq. Amma 2017-ci ildə yaradılan "Qobustan" ötən il Astara təmsilçisiylə, cari mövsümdə isə "Zəfər 44" ilə oyunda insident yaradıb. Deməli, klub futbol oynamaqdan çox aqressivlik yaratmaqda maraqlıdı. Biz hansı komandalarla bu vaxta kimi davalar etmişik? Heç kim nümunə çəkə bilməz. Futbolçularımız qayda pozuntusu ediblər və buna görə də AFFA İntizam Komitəsi tərəfindən ağır cəzalar almışıq. Hətta baş məşqçimizə də 10 oyunluq cəza verilib. Amma biz rəqib komanda kimi nə oyun başlayandan söyüş söymüşük, nə davanı başlatmışıq, nə də hakimləri və digər şəxsləri döymüşük. Belə hal olmayıb. Sadəcə, matça əlavə olunan dəqiqələrdə hakim növbəti dəfə əleyhimizə qərar verdi və rəqib autdan topu oyuna daxil edərkən futbolçumuzdan biri hakimin üzərinə getdi. Buna görə də “qırmızı” aldı. Bir də futbolçumuzun biri tanımadan AFFA nümayəndəsini itələyərək yıxıb. Həmin vaxt da rəqib futbolçular tərəfindən söyüşlər daha da artmışdı. AFFA nümayəndəsinin başında kapüşon olduğundan oyunçumuz onu tanımayıb və rəqib komandanın nümayəndəsi bilərək yerə yıxıb. Haqqımızda deyilən qalan şeylərin çoxu şişirtmədi".