"Dünən baş tutan "Neftçala" - "Qobustan" oyunu hakim səhvləri ilə yadda qaldı. O, rəqib komandanın futbolçularına meydanda işlətdikləri nalayiq ifadələrə görə cəza vermədi. Tural İbrahimov, demək olar ki, oyuna heç bir müdaxilə etmədi. Bir neçe epizodda aşkar tərəfkeşlik etdi. Bizə qarşı çox ədalətsiz qərarlar verdi. Rəqibin futbolçusu 1 metr irəlidə olsa da, nə yan xətt hakimi bayrağını qaldırdı, nə də İbrahimov qayda pozuntusu qeydə aldı. Nə qədər etirazımızı bildirsək də, xeyri olmadı, qərar dəyişmədi. Topun meydanı rəqibdən tərk etdiyi anda yan xətt hakimi əks istiqaməti göstərdi. Oyunun sonuna 3 dəqiqə qalmış futbolçularımız hakimin üstünə gedib, haqlarını tələb etdilər. Referi oyunçumuza qırmızı vərəqə göstərdi və əlavə etdiyi 3 dəqiqəni oynatmadan görüşü bitirdi. Hələ deyir ki, "təhlükəsizliyim təmin olunmayıb". 90 dəqiqə təmin olunub da, yalnız son 3 dəqiqədə belə hadisə baş verib. Hər kəs bilir ki, AFFA-nın qərarlarına görə, polis olmadan matçlar başlamır. Əminliklilə deyə bilərəm ki, Neftçaladakı oyunlarda rayonumuzun polisləri təhlükəsizliyi lazımi şəkildə təmin edirlər. Heç bir problem olmur. Amma Tural İbrahimov oyun ərzində rəqibin futbolçuları ilə deyib-gülür, zarafatlaşırdı. Biz onun obyektiv olduğuna necə inanaq? Hər iki komanda hakimi gözləyir, amma referi oyunu bitirir. Həqiqətən də onun təhlükəsizliyi təmin olunmayıbsa, bunu sübut etsin. Niyə sona 3 dəqiqə qalmış matçı başa çatdırır? Bunu bilmək haqqımızdı. Eyni vəziyyət "Qobustan"nın "Zəfər 44"lə görüşündə də baş verib. "Qobustan" hakimlərə təzyiq edir belə olması üçün, yoxsa necə?"