Region Liqası maraqlı layihədi. Əksər bölgələri əhatə etdiyinə görə “Futbol+” olaraq biz də bu turnirə yetərincə diqqət ayırırıq. Amma həvəskarların top qovduğu yarışda ağlasığmaz olaylar yaşanır.

Səbəb, təbii ki, nəzarətin lazımi səviyyədə olmamasıdı. Bunun nəticəsidi ki, hakimlər, rəqib komandaların üzvləri dəfələrlə təhqirlərə, fiziki təsirə məruz qalıb. Təhlükəsizliyi təmin olunmadığına görə görüşü yarımçıq dayandıran referilər də olub. Bura çoxsaylı təxirəsalmaları, texniki məğlubiyyətləri, bəzi komandaların pley-off mərhələsi başlamadan turnirdən qovulmasını da əlavə edə bilərik. Elə İntizam Komitəsinin dünən keçirilən iclasında qəbul olunan qərarları oxuyarkən də növbəti biabırçılıqların yaşandığını görmək mümkündü. Sözü çox uzatmadan mətləbə keçək.

Fevralın 25-də keçirilən “Neftçala” – “Qobustan” oyununda başverənlər döyüş filminin süjet xəttini xatırladır. Belə ki, meydan sahiblərinin futbolçusu Nadir Orucov 90+2-ci dəqiqədə hakimlər briqadasını təhqir etməklə kifayətlənməyərək, onlara hücum da edib. Tam təbii olaraq qarşısında qırmızı vərəqə görən Orucov növbəti 10 oyunu buraxacaq.

Onun komanda yoldaşları - Rəhim Bayramzadə, Sehran Abbasov və Məhəbbət Əsgərov isə 4 oyunluq cəzalandırılıb. Səbəb hakimlər briqadasının və AFFA nümayəndəsinin təhqir olunmasıdı. Bu da son deyil. Əsl həngamə final fitindən sonra qopub. “Neftçala”nın texniki zonası rəqibin texniki zonasına hücum edib. Nəticədə kütləvi qarşıdurma yaranıb. Az öncə adını çəkdiyimiz futbolçular burda da ön planda olub ki, onlar əlavə 6 oyun cəzalandırılıb. “Neftçala”nın baş məşqçisi Mehman İbrahimov da hadisələrin mərkəzində yer alıb. Mütəxəssis qarşılaşmadan sonra hakimlər otağına soxularaq onları həm təhqir edib, həm də fiziki təzyiqə cəhd göstərib. İntizam Komitəsi buna görə onu 10 oyun cəzalandırıb.

Fevralın 27-də keçirilən “Marxal” – “Karvan” oyununda da insident yaşanıb. Meydan sahiblərinin baş məşqçisi Xalid Salamov hakimlər briqadasını təhqir edib. Qırmızı vərəqə ilə cəzalandırılan mütəxəssis növbəti 5 oyunu kənardan izləyəcək.

Uzun sözün qısası, hər keçən gün olaylar cızığından çıxır. Bunun sonu isə heç də yaxşı görünmür. Allah eləməsin, sabah kimsə meydanda və ya stadionun ərazisində qətlə yetirilsə, bunun altından çıxmaq çox çətin olacaq. Ona görə də təşkilatçı qurum AFFA-nın başbilənləri papağını qabağına qoyub fikirləşməlidi.

Görünən budu ki, İntizam Komitəsinin sanksiyaları yetərli deyil. Bu üzdən klubların rəsmiləri, təmsil etdikləri bölgələrin rəhbərləri ilə ciddi söhbət aparmaq, onlardan nəzarəti gücləndirməyi tələb etmək lazımdı. Sabah bədbəxt hadisələr yaşanmasın deyə.

Bizim əlimizdən xəbərdarlıq etmək gəlir ki, bunu da etdik.

KƏNAN HƏSƏNOV