AFFA İntizam Komitəsinin dünən baş tutan iclasında Region Liqası ilə bağlı maraqlı qərarlar qəbul olunub. Diqqətimizi üç oyunla bağlı qeydlər çəkdi ki, onları sizinlə bölüşməyi məqsədəuyğun saldıq.

“Sədərək” “Arpaçay” (Şərur) ilə səfər oyununa vaxtında getmədiyinə görə 0:3 hesablı texniki məğlubiyyət alıb. Amma bu hal üçüncü dəfə təkrarlandığı üçün komanda yarışdan kənarlaşdırılıb. “İrəvan” – “Difai” görüşündə isə qonaqların heyətində İntizam Komitəsi tərəfindən hakimi təhqir etdiyinə görə 4 oyunluq cəza alan Gülalı Mehrəliyev iştirak edib ki, buna görə də komandaya texniki məğlubiyyət verilib.

Ötən sayımızda yer verdiyimiz “Zəfər 44” – “Qobustan” qarşılaşması ilə bağlı isə sərt qərarlar qəbul olunub. Belə ki, 1-ci hissə bitəndən sonra meydan sahiblərinin baş məşqçisi Vidadi Salmanov və əlaqələndiricisi Bəxtiyar Salmanov hakimlər briqadasına hədə-qorxu gəlib və onları təhqir edib. Komitə bu üzdən onların hər ikisinin 10 oyun stadiona girişini qadağan edib. Klub tərəfindən təhlükəsizlik tədbirləri görülmədiyi üçün hakimlər briqadası 2-ci hissədə meydana çıxmayıb. “Zəfər 44” buna görə 0:3 hesablı texniki məğlubiyyətlə üzləşib. Azarkeşlər tərəfindən hakimlərə təzyiqlər, onları vurmağa cəhdlər edildiyinə görə isə komanda növbəti 1 oyunu tamaşaçısız keçirəcək.

Sonda onu da qeyd edək ki, ötən sayımıza açıqlama verən Bəxtiyar Salmanov hakimləri qərəzli idarəçilikdə suçlayıb, onların təhdid və təhqirlərlə üzləşmədiyini söyləmişdi. İntizam Komitəsinin qərarlarından isə görünən budu ki, Cəlilabadda vəziyyət həqiqətən cızığından çıxıb. Klub rəsmisi, sadəcə, sudan quru çıxmağa cəhd edib.