Avstriya pasportuna malik türk Rami Tekinin “Sumqayıt”da baxışda olduğunu xəbər vermişdik.

Hücumameyilli yarımmüdafiəçi “kimyaçılar”ın “Sabah”la yoxlama görüşündə də meydana çıxmaq imkanı qazanmışdı. “Tələbələr”lə matçdan sonra “Football-plus.az” saytına müsahibə verən “Sumqayıt”ın baş məşqçisi Aleksey Baqa baxışda olan futbolçular barədə iyulun 14-də keçiriləcək “Kəpəz”lə qarşılaşmadan sonra qərar verəcəyini bildirməsinə baxmayaraq, əldə etdiyimiz məlumata görə 25 yaşlı futbolçu “ağ-göylər”in düşərgəsini tərk edib.

Bizə çatan bilgiyə əsasən, son klubu “Vakker” olan yarımmüdafiəçi Baqadan onunla bağlı qərarını bildirməsini istəyib. Ancaq belaruslu mütəxəssis bunu yalnız Gəncə təmsilçisi ilə görüşdən sonra edə biləcəyini söyləyib ki, bu da Avstriya U-21-nin sabiq futbolçusunun ürəyincə olmayıb. Və “Sabah”la oyunun ertəsi Tekin vətəndaşı olduğu ölkəyə qayıtmağı lazım bilib.

RƏŞAD