İyunun 27-də doğma şəhərdə təlim-məşq toplanışına start verən “Sumqayıt” dünən hazırlıq prosesi çərçivəsində ilk yoxlama oyununu keçirdi. “Kimyaçılar”ın rəqibi “Sabah” idi. “Kapital Bank Arena”da keçirilən qarşılaşma meydan sahiblərinin 2:1 hesablı qələbəsi ilə yekunlaşdı. Oyundan sonra meydan sahiblərinin çalışdırıcısı Aleksey Baqa “Football-plus.az” saytına həm matçla bağlı fikirlərini bildirdi, həm də qarşıdakı planlar barədə danışdı.
- Öncə mövsümlərarası fasilədə keçirdiyiniz ilk yoxlama görüşü barədə fikirlərinizi bölüşərdiz.
- Əvvəlcə onu bildirim ki, heç bir məşq qeyri-rəsmi olsa da, oyunun əvəzini vermir. Həm həmkarımı görməyimə şad oldum, həm də yoxlama görüşü olmasına baxmayaraq, komandamın qalib gəlməsinə sevindim. Həm də düşərgəmizə yeni qoşulan yeniləri də iş başında görmək imkanı yarandı. Hazırlıq prosesində qalib gəlmək psixoloji cəhətdən futbolçularda özünəinam yaradır. Bir sözlə, bu axşam müsbət məqamlar yaşandı.
- Yenilərdən söz düşmüşkən, baxışda olanların hamısına meydana çıxmaq şansı yaratdız. Onlar barədə fikirləriniz...
- Əvvəlcə onlara “çox sağ ol” deyirəm ki, təklifimizi qəbul edib komandaya baxışa gəliblər. Baxışda olanlar bir müddətdi bizimlə məşq edirlər. Bu gün isə onları oyunda izlədik. Qərarımızı yaxın günlərdə açıqlayacğıq.
- Növbəti yoxlama görüşündə “Kəpəz”lə qarşılaşacaqsız. İyulun 14-nə kimi baxışda olanlar barədə qərarınızı açıqlayacaqsız, yoxsa həmin oyunda onlara şans verməyi düşünürsüz?
- Hər şey ola bilər. İndidən hadisələrin necə cərəyan edəcəyini söyləmək mümkün deyil. Qarşıdakı günlərdə daha bir neçə futbolçunun məşqlərə qoşulacağını gözləyirik. İndi elə vaxtdı ki, yeni mövsüm ərəfəsində hər dəqiqə qızıldı. Bugünkü oyun da bizə bəzi siqnalları verdi. Ola bilər ki, iyulun 14-də keçiriləcək matçda bu gün meydana çıxan futbolçuların hamısı olsun, ola da bilər ki, heç birini görməyəsiz.
- İyulun 16-da komanda toplanışın növbəti mərhələsi üçün Türkiyəyə yollanacaq. Orda iki yoxlama matçı keçirəcəyiniz dəqiqdi. Artıq rəqiblər bəllidi?
- Məşq öz yerində, ancaq yoxlama oyunları vacibdi. Rəqiblərin müəyyənləşdirilməsi yönündə işlər gedir. Çempionatın startına bir aydan da az qalıb. Qeyd etdiyim kimi, düşərgəyə yeni oyunçular da qoşulacaq.
- Bugünlərdə “Sumqayıt”a yeni fiziki hazırlıq üzrə baş məşqçi gəlsə də, rumın mütəxəssis burda çox qalmadı. Yeni məşqçinin gələcəyi gözlənilir?
- Əlbəttə, axtarışlar davam edir. Hansı ölkədən olması bizim üçün vacib deyil. Rumınla söhbətimiz alınmadı ki, bu da yaradıcılq mühitində normal qarşılanmalıdı. Ortada fikir ayrılığı varsa, ilk gündən yolları ayırmaq daha məqsədəuyğundu.
RƏŞAD