Səhvsiz insan olmadığı kimi, qurum da yoxdu. PFL-in də səhvi, deyəsən, “Karvan-Yevlax”ı elitaya buraxmaqdı. Hələ ötən mövsümün sonlarında dedilər ki, meydançamız süni ot örtüklü olacaq. Hər kəs klubu tənqid etdi ki, süni örtüyümüz çox idi, bu da əlavə. Sonra dedilər ki, təbii olacaq. Hər kəs alqışladı. İşlər start götürəndə də elan verdilər ki, süni olacaq. İctimaiyyəti, medianı ələ saldılar.

Tənqidlərdən uzaq qalmaq üçün yalançı çıxmağa razı oldular. Ot örtüyü də çox gec hazır oldu. “Bu gün, sabah” deməklə işlər noyabrın 21-ə qədər uzandı. Amma heç indi də stadion standartlara uyğun deyil. Azarkeşlər üçün tualet ağacın altında, hansı vəziyyətdədi, görənlər bilir. Tualetə çatmamış məhz ora yaxınlaşdığını hiss edirsən. Üfunət qoxusu az qala ehtiyat oyunçular skamyasında oturan futbolçuları da “bihuş edir”. Media nümayəndələri üçün ayrılan tualet isə konfrans salonunda, baş məşqçinin oturduğu yerin arxasındadı. Səhv etmirəmsə, Kaxaber Sxadadzenin oyunsonrası mətbuat konfransı idi. Konfransın ortasında tualetdən kimsə çıxdı, əlini çırmalaya-çırmalaya çıxdı çölə. Fiasko, biabırçılıq. Nə qoyaq adını? Konfrans salonunun stulları da media sektorundan götürülür, jurnalistlərin sayına uyğun olaraq qoyulur. Əskik olanda da kimlərsə ayaq üstə qalır.

Komandanı 1-ci liqada üçüncü edən Kənan Kərimov rəsmən funksioner – vitse-prezident olsa da, görünür, məşqçilikdən kənar qala bilmədi. Səssiz-səmirsiz Azər Həşimovu gətirdi, bütün işləri özü gördü. Əvəzetmə qərarlarına qədər Kərimov verdi. Gördülər, işlər yolunda getmir, sonuncu olmağa real namizəddilər, Kərimovu məşqçilikdən “uzaqlaşdırmaq” əvəzinə Azər Həşimovu göndərdilər. Və iki ay məşqçinin pulunu vermədilər. Nə əvvəldən qalan maaşını, nə də müqaviləyə əsasən haqqı olan təzminatı. Füzuli Məmmədov da azarkeşlərə “səbr edin” deyir. Bu “Karvan-Yevlax” 1-ci liqadan da üzüağ çıxa bilməz. Son mövsümlərdə elitada qalmaq uğrunda mübarizə olurdu. Bu mövsüm turnir cədvəlində mübarizə görünsə də, çempionatı izləyən 10 adamdam doqquzu deyir ki, “Karvan-Yevlax” elitanı tərk edəcək.

Klub qeyri-peşəkarlıq üzərində qurulub. Ancaq başaldatma, yalan... Təlim-məşq toplanışı haqda xəbər yayanda bildirilib ki, komanda yanvarın 17-i “Kəpəz”lə qarşılaşacaq, növbəti oyun haqda da məlumat veriləcək. Lakin ortada nə oyun var, nə də məlumat. Bir oyunla yola veriblər. Əslində bir oyun keçirmək problem deyil, ictimaiyyətdi aldatmaqdı problem...

Keyfiyyəti olan-olmadı, hər cür futbolçunu yığıb gətiriblər komandaya. Nika Çaçaşvili adında bir futbolçu var. Bu mövsüm cəmi bir oyunda meydanda olub, o da “Şəki” ilə kubok matçında. 2-ci liqa təmsilçisini keçmək üçün belə transfer edilib? Klubun sponsoru yoxdu. AFFA-nın ayırdığı 2 milyon yarım bunun üçün verilib? Güzəşt olundu, əvəzedici liqada iştirak etməmələrinə icazə verdilər. O pulun da üstünə bir az qoyub keyfiyyətsiz legionerlərdən birini gətiriblər.

İndi də yayda etdikləri seleksiya “davam edir”. Desələr ki, “Karvan-Yevlax” artıq üç transfer edib, düşünərəm ki, maşallah, qarşıya qoyduqları məqsədə çatırlar. Amma futbolçulara baxanda başa düşülür ki, həqiqətən də “Karvan-Yevlax” hazırlaşır, amma 1-ci liqaya. Üç futbolçudan biri Rauf Rüstəmlidi. Rauf gənc, keyfiyyətli futbolçudu. Amma nə “Sabah”a, nə də “Sumqayıt”a lazım deyil. Bu mövsüm cəmi 121 dəqiqə meydanda olub. Digər iki transferin yanında Rauf “toya getməlidi”. Yevlaxlılar elitada qalmaq üçün …1-ci liqadan futbolçu alır.

Samir Abdullayev “Mingəçevir”dən, Emin Rüstəmov “Səbail”dən alınıb. Hər halda, “Səbail” özünə lazım olan futbolçunu göndərməz. Elitanı hədəfləyən komandaya lazım olmayan futbolçunu elita təmsilçisi heyətinə qatır. Bu nə təzad, necə yanaşmadı?

MÜZƏFFƏR QULUZADƏ