Dünənki oyunda “Sabah”ın çoxlu qol imkanını əldən verməsi qədər Aaron Maludanın ehtiyatda qalması da təəccüb doğurdu. Çempionun ən parlaq ulduzlarından biri heç sonradan da meydana çıxmadı. Bu üzdən oyunsonrası mətbuat konfransında Valdas Dambrauskasa “Maludanın meydanda olmamasının səbəbi nə idi” sualı ünvanlandı. “Sabah”ın baş məşqçisinin bu suala verdiyi cavaba baxaq: “Maluda nə fiziki, nə də psixoloji cəhətdən bu oyuna hazır idi”.
Cavabın “psixoloji” hissəsini başa düşdük; Kamilo Duranı “Qarabağ”dan qaçıran təklifin biri də Maludaya gəlib. Ya “Seltik”dən, ya da “Bazel”dən - əslində hansından gəlməsinin elə bir prinsipial fərqi yoxdu. Amma Dambrauskasın “Maluda fiziki cəhətdən də hazır deyil” sözü şəxsən mənə qəribə gəldi. Bu adam iyulun 14-də “Nyu Seynts”ə qarşı 76 dəqiqə oynayıb. Son bir həftədə fiziki durumunda necə problem yaşana bilər? Bəlkə heç məşqə çıxmağı lazım bilmir, kluba hansısa ultimatum verib?
Digər tərəfdən, fiziki və psixoloji cəhətdən hazır olmayan futbolçunun adı bu oyun üçün iştirak ərizəsinə niyə salınmışdı?
Sonda onu da xatırladım ki, “Sabah” bu ilin yanvarında 20 yaşlı vingerin transfer hüququnu “Lill”dən alıb, Maluda ilə yeni – 4 illik müqavilə bağlayıb.
ORXAN