"Baş vermiş hadisəylə bağlı şişirtmələr olub. Bəzi saytlar yalandan tirajlayıblar ki, güya biz polisləri söymüşük, "Sumqayıt" azarkeşləriylə də dava etmişik. Bunların heç biri həqiqəti əks etdirmir. Özüm orda olmuşam. Hadisə başqa cür olub. Belə ki, meydan sahiblərinin ağsaqqal azarkeşlərindən ikisi bizim fanatlara xoş olmayan söz atdı. Bundan sonra azarkeşlərimiz onların üzərinə getdi. Bunu görən polislər özünü yetirdilər. Tezliklə aranı qarışdırmaq istəyən iki ağsaqqal azarkeş tribunadan uzaqlaşdırıldı. Amma bizim fanatların hirsi soyumadı. Söz yox ki, onlar nə qarşı tərəfin azarkeşlərinə artıq-əskik sözlər dedi, nə də aqressivlik nümayiş etdirdi. Sadəcə, emosional çıxışlar etdilər. Sonra polislər bizə yaxınlaşaraq absurd tələblər qoydular. Bunlar arasında “siqaret çəkmək olmaz”, “koftanı çıxarmaq qadağandı”, “rəqib komanda və azarkeşlərə təzyiqli” replikalar olmaz və s. tələblər var idi. Belə yanaşmadan sonra əksər azarkeşlərimiz könüllü şəkildə tribunaları tərk etdi. Ümumiyyətlə, tribunadakılara polisin yersiz müdaxilələri çoxdu. Danışanda Avropaya inteqrasiyadan dəm vururuq, amma Avropa stadionlarındakı azarkeş qayda-qanunlarına inteqrasiya edə bilmirik. Məhz Avropada tribunada siqaret də çəkirlər, pivə də içirlər, şüar da səsləndirirlər. Nəinki koftalarını, hətta şalvarlarını da soyunub yelləyənlər var. Uzağa getməyək, qardaş Türkiyəyə baxaq. Orda stadionlara axın edənlər bizdən dəfələrlə çoxdu. Amma bizim kimi mühafizəni polislərə həvalə etmirlər. Ümumiyyətlə, onlar polis yox, stadionun təhlükəsizlik işçiləri olur. Onların işi xüsusi hallarda, əsasən də kənardan kiminsə stadiona müdaxilə etməsinin qarşısını almaqdı. Bizdə polislərin sayı çox olduqca nə azarkeşlər tribunaları dolduracaq, nə də “12-ci oyunçu” amili möhkəmlənəcək".