Masazırdakı dava ətrafında söz-söhbət böyüyür - "Orhus" "Sabah"ın bəyanatını təkzib etdi!
"Orhus"la oyun “Sabah”ın inamlı qələbəsi ilə bitsə də, ardından sosial şəbəkələrin Azərbaycan və Danimarka seqmentində yayılan videolar aranı qarışdırdı, daha doğrusu, stadion ərazisində yaşanan qanlı hadisələri gün işığına çıxardı.
Oyundan əvvəl hər iki tərəfin azarkeşləri arasında dava düşdüyü bəlli idi. Hətta “Futbol+”in əməkdaşlarından İsrayil Xeyrullayevdə hadisələrin videosu da var idi. Düzdü, bu informasiya hələ o qədər də geniş yayılmamışdı. Lakin Danimarka mətbuatının, daha dəqiqi, “Bold.dk"nin baş verənlərlə bağlı "Orhus"un direktorundan açıqlama alması aləmi bir-birinə qatdı.
Nəşrin iddiasına görə, matçdan bir saat əvvəl 40-50 qarageyimli "Sabah" azarkeşi rəqibin tərəfdarlarına hücum edib. İş o yerə gəlib çatdı ki, "Sabah" srağagün hadisəylə bağlı bəyanat yaymalı oldu. İş ondadı ki, "Orhus"dan "Sabah"ın bəyanatına operativ cavab gəlib. "Bold.dk"nın yaydığı məlumata görə, klubun Kommunikasiya şöbəsinin rəhbəri Kristian Tay-Petersen "bayquşlar"ın iddialarını təkzib edib:
"Sabah" bildirir ki, davadan əvvəl "Orhus" azarkeşləri tərəfindən sözlü aqressivlik nümayiş etdirilib. Tam yalandı! Öz gözlərimizlə gördük ki, 40-50 azarkeş bizim tərəfdarlarımıza hücum etdi. Əlimizdə olan sübutlara əsasən bildiririk ki, hadisədən əvvəl azarkeşlərimiz hansısa sözlü aqressivliyə yol verməyib. Azarkeşlərimiz Masazırda heç kimi təqib etməyib. Bizim nəqliyyat vasitələrimiz yanlış yerdə dayandırıldı. Tərəfdarlar avtobusdan düşər-düşməz hücumlara məruz qaldı. Biz baş verən hadisələri sənədləşdirmişik və bu barədə UEFA-ya dolğun məlumat göndərmişik".
"Orhus"un iddiasına görə, "Sabah" azarkeş avtobusunun saxlanılacağı yeri düzgün təyin etməyib. Münaqişə məhz rəqib tərəfdarların eyni ərazidə yer alması üzündən yaranıb. Həmçinin qarşıdurma nəticəsində 12 tərəfdar hüquq-mühafizə orqanları tərəfindən saxlanılıb. Maraqlıdı, onların arasında danimarkalı varmı? Artıq hər biri sərbəst buraxılıbmı? Həmçinin "bayquşlar"ın iddialarla bağlı mövqeyi necədi?
Bu suallarla "Sabah"ın mətbuat xidmətinin rəhbəri Elnur Həmidova müraciət etdik:
"Biz "Orhus" tərəfdarlarının avtobusu üçün tribunalarının yanında olan dayanacağı qeyd etmişdik. Lakin nəqliyyat vasitəsi qonaq azarkeşlərinin təkidi ilə "Sabah" tərəfdarlarının yanında saxlamalı olub. Ardından baş verən hadisələrlə bağlı əlimizdə videomateriallar var. Azarkeşlərə gəlincə, saxlanılanlar arasında danimarkalı olmayıb. Habelə onların sərbəst buraxılması haqda bizə məlumat verilməyib".
KƏNAN BAHADIR
Digər xəbərlər
