Həftə futbol ictimiyyəti üçün yetərincə gərgin və maraqlı keçir. "Sabah"la "Qarabağ"ın avrokubok oyunlarının ardından növbə Misli premyer-liqasına çatdı.

Bizi 12 komandanın iştirakı ilə üç dövrədən ibarət olan mübarizə, bir-birindən gərgin keçəcəyinə şübhə etmədiyimiz 33 tur gözləyir. İlk turla bağlı maraqlı məqamlar var. PFL "Sabah"ın müraciətini və "Kəpəz"in razılıq məktubunu nəzərə alaraq bu komandalar arasındakı 1-ci və 2-ci dövrə oyunlarının yerini dəyişib. Beləliklə, "sarı-göylər"in yenilənən Gəncə şəhər stadionunda ilk rəsmi matçı keçirməsi bir qədər də yubanacaq.

"Şamaxı" PFL-in yeni mövsümlə bağlı qərarına əsasən, stadionunda süni işıqlandırma sistemi olmadığına görə ilk dörd turda səfərdə oynamalı olacaq. Komanda həmin rəqiblərlə ikinci dövrədə evdə qarşılaşacaq. "Sumqayıt" - "Neftçi" görüşünün də yeri dəyişib. Buna Mehdi Hüseynzadə adına stadionun ot örtüyünün sıradan çıxması səbəb olub. Onu da xatırladaq ki, harda keçirilməsindən asılı olmayaraq, bütün oyunlar "CBC Sport"un efirində canlı yayınlanacaq.

14 avqust
Turan Tovuz – Qəbələ
"Turan Tovuz"un bu rəqiblə ev oyunlarının balansı: 6:+3=2-1, 9:8.
2022/23 - 0:2, 1:1; 2023/24 - 2:2, 2:1; 2025/25 - 1:0, 3:2.
"Futbol+"in proqnozu: 50-30-20.
Hakimlər: TURAL QURBANOV, Cəmil Quliyev, Asiman Əzizli, Emin Əliyev.
VAR hakimi: Elçin Məsiyev.
VAR hakiminin köməkçisi: Gülnurə Əkbərzadə.
Hakim-inspektor: Babək Quliyev.
AFFA nümayəndəsi: Elgiz Abbasov.
Tovuz, şəhər stadionu. Saat 19.30.

Ötən mövsümü 3-cü pillədə tamamlasa da, məlum səbəbdən Konfrans Liqasında iştirak edə bilməyən "Turan Tovuz" yeni mövsümdə daha uğurlu olmaq niyyətindədi. Ev oyunlarını minlərlə azarkeşinin dəstəyi altında keçirəcək "bozqurd" çempionluq uğrunda mübarizə aparacaq. Tovuzlular heyətin formalaşdırılması yönündə önəmli addımlar atmaq əvəzinə aparıcı oyunçularını qorumağa üstünlük verib. Bu strategiyanın özünü nə dərəcədə doğruldacağını zaman göstərəcək. Hər halda, təcrübəli Kurban Berdıyevlə yeni müqavilə imzalanıb və o, daha iki il komandanı çalışdıracaq. Elitada qalmaq üçün tər tökəcək "Qəbələ" isə bir neçə legioner alıb. "Qırmızı-qaralar"ın əsas məqsədi ötən mövsümdəki səhvləri təkrarlamamaq, "futbol ili"ni düşmə zonası sayılan yerlərdə keçirməmək olacaq.

Bu komandalar indiyə qədər 11 dəfə qarşılaşıb. Həmin oyunların 6-da "Turan Tovuz", 2-də "Qələbə" qalib gəlib, 3-də "sülh" qeydə alınıb. Topların nisbətində "bozqurd" öndədi - 16:14.

15 avqust
Araz-Naxçıvan – İmişli
"Araz-Naxçıvan"ın bu rəqiblə ev oyunlarının balansı: 2:+1=0-1, 2:1.
2025/26 - 2:0; 0:1.
"Futbol+"in proqnozu: 30-40-30.
Hakimlər: ƏLİYAR AĞAYEV, Zeynal Zeynalov, Akif Əmirəli, Ruslan Quliyev.
VAR hakimi: Nicat İsmayıllı.
VAR hakiminin köməkçisi: Tərlan Talıbzadə.
Hakim-inspektor: İmanxan Sultani.
AFFA nümayəndəsi: Erkin Hüseynov.
Qəbələ, şəhər stadionu. Saat 18.30.

Mövsümlərarası fasilə "Araz-Naxçıvan" üçün yetərincə hərəkətli keçdi. "Qırmızı-ağlar"da həm prezident, həm baş məşqçi, həm də böyük ölçüdə heyət dəyişikliyi oldu. Hətta komandanın ev oyunlarını keçirəcəyi stadion da dəyişdi. Bu üzdən Cavid Hüseynovun çalışdırdığı komandadan nə gözləyəcəyimizi bilmirik. Mütəxəssis qəzetimizə açıqlamasında kollektivin qarşısına avrokuboklara vəsiqə qazanmaq hədəfinin qoyulmadığını, lakin mümkün qədər yüksək pillələrdə qərarlaşmaq üçün əllərindən gələni əsirgəməyəcəklərini bildirib. Belədə qalan məsələləri zamanın hökmünə buraxmağa məcburuq. "İmişli" də müəyyən dəyişikliklərlə yadda qaldı. Yeni baş məşqçi Fərid Namazovun rəhbərliyi altında mübarizə aparacaq Aran təmsilçisi ev oyunlarını Yevlaxda keçirəcək. Heyətdə də islahatlar aparan komanda elitada möhkəmlənməyə çalışacaq.

Bu komandalar indiyə qədər 3 dəfə üz-üzə gəlib. Bunlarıb 1-də "qırmızı-ağlar", 1-də "pələnglər" qələbə qazanıb, 1-də qalib müəyyənləşib. Topların nisbətində naxçıvanlılar öndədi - 4:3.

Sabah – Kəpəz
"Sabah"ın bu rəqiblə ev oyunlarının balansı: 8:+4=2-2, 15:8.
2022/23 – 5:0, 2:0; 2023/24 – 2:2, 3:2; 2024/25 – 2:2, 0:1; 2025/26 – 1:0, 0:1.
"Futbol+"in proqnozu: 50-30-20.
Hakimlər: FƏRİD HACIYEV, Rəhman İmami, Müslüm Əliyev, Əli Əliyev.
VAR hakimi: Rauf Cabbarov.
VAR hakiminin köməkçisi: Elşad Abdullayev.
Hakim-inspektor: Asim Xudiyev.
AFFA nümayəndəsi: Zümrüd Ağayeva.
Bakı, "Bank Respublika Arena". Saat 20.45.

Ən azı Avropa Liqasının liqa mərhələsində mübarizə aparacağı dəqiqləşən "Sabah"ı çətin mövsüm gözləyir. "Bayquşlar" sıx qrafik çərçivəsində ardıcıl ikinci dəfə çempion olmaq uğrunda döyüşəcək. O başqa məsələ ki, Valdas Dambrauskarın sərəncamında geniş və keyfiyyətli heyət var. Yeni mövsümə yeni baş məşqçi - Azər Məmmədov ilə başlayacaq "Kəpəz" də güclü olmağa məcburdu. Ev oyunlarını Gəncədə keçirəcək "sarı-göylər" güclü təzyiq fonunda uğur qazanmağa çalışacaq.

Bu komandalar indiyə qədər 15 dəfə qarşılaşıb. Bunların 9-da "Sabah", 3-də "Kəpəz" qalib gəlib, 3-də heç-heç qeydə alınıb. Topların nisbətində "bayquşlar" öndədi - 32:17.

16 avqust
Sumqayıt – Neftçi
"Sumqayıt"ın bu rəqiblə ev oyunlarının balansı: 27:+9=4-14, 31:37.
2011/2012 – 0:3; 2012/13 – 3:2; 2013/14 – 1:2, 2:0; 2014/15 – 0:1, 0:1; 2015/16 – 1:2, 2:1; 2016/17 – 2:0, 2:0; 2017/18 – 1:0, 2:0; 2018/19 – 0:2, 1:2; 2019/20 – 2:4; 2020/21 – 0:0, 0:1; 2021/22 – 1:1, 0:2; 2022/23 – 2:2, 0:4. 2023/24 – 0:1, 2:1; 2024/25 – 2:0, 2:2; 2025/26 – 0:2, 1:3.
"Futbol+"in proqnozu: 20-40-40.
Hakimlər: KAMAL UMUDLU, Namiq Hüseynov, Vüsal Məmmədov, Əkbər Əhmədov.
VAR hakimi: Kamranbəy Rəhimov.
VAR hakiminin köməkçisi: Pərvin Talıbov.
Hakim-inspektor: Şahin Cəfərov.
AFFA nümayəndəsi: Seymur Səlimli.
Sumqayıt, "SOCAR Polymer Arena". Saat 19.00.

"Sumqayıt"ın yeni mövsümdə nə dərəcədə iddialı olacağı sual altındadı. Hələ nə yeni baş məşqçi Filipe Kandido, nə də hansısa klub rəsmisi bu yöndə açıqlama verib. O bəllidi ki, heyətdə müəyyən dəyişikliklər edən "kimyaçılar" ən pis halda ortabablar sırasında qərarlaşmağa borcludu. "Neftçi"nin durumu isə tam fərqlidi. İkiillik fasilədən sonra Konfrans Liqasında iştirak edən paytaxt təmsilçisi fiasko yaşadı. Bakılılar qarşıdan gələn 90 illik yubileyini azı bir titulla tamamlamalıdı ki, azarkeşlərini razı sala bilsin. Bəli, Vernidubla imzalanan yeni müqavilə və bir neçə transfer 2026/27 "futbol ili" üçün ümid verir. Ancaq hər şeyə yaşıl meydanda aydınlıq gələcək.

Bu komandalar indiyə qədər 54 dəfə üz-üzə gəlib. Bunların 15-də "Sumqayıt", 26-də "Neftçi" qələbəyə sevinib, 13-də qalib müəyyənləşməyib. Topların nisbətində "ağ-qaralar" öndədi - 84:59.

Zirə – Şəfa
"Zirə" bu rəqiblə evdə qarşılaşmayıb.
"Futbol+"in proqnozu: 50-30-20.
Hakimlər: ELVİN BAYRAMOV, Kamran Bayramov, Rahil Ramazanov, Vüqar Həsənli.
VAR hakimi: Rəşad Əhmədov.
VAR hakimi: Eyyub İbrahimov.
Hakim-inspektor: Orxan Məmmədov.
AFFA nümayəndəsi: Nəriman Axundov.
Zirə, İdman Kompleksinin stadionu. Saat 21.00.

"Zirə"nin də qalan avrokubok iştirakçıları kimi yeni mövsümə daha hazırlıqlı olduğunu deyə bilərik. Düzdü, KL-in ardından yoxlama oyunu keçirməyən qəsəbə təmsilçisinin formada olmamaq ehtimalı da böyükdü. Hər halda, Rəşad Sadıqovun komandası üçün "Şəfa" ilə qarşılaşma o qədər də çətin keçməməlidi. 21 il sonra premyer-liqaya qayıdan “Şəfa”nın debüt matçında nə ilə yadda qalacağını da səbirsizliklə gözləməyə dəyər.

17 avqust
Qarabağ – Şamaxı
"Qarabağ"ın bu rəqiblə ev oyunlarının balansı: 39:+25=10-4, 74:21.
1999/2000 - 2:0; 2000/01 - 3:0; 2001/02 - 1:2; 2002/03 - 3:1; 2004/05 - 3:1; 2005/06 - 1:0; 2006/07 - 0:1; 2007/08 - 0:1; 2008/09 - 1:1; 2009/10 - 1:1, 1:1; 2010/11 - 1:0, 1:0; 2011/12 - 1:0, 1:0; 2012/13 - 0:0, 3:2; 2013/14 - 2:0, 4:1; 2014/15 - 0:0, 0:0; 2015/16 - 1:0, 2:0; 2016/17 - 0:0, 0:1; 2017/18 - 1:0, 1:1; 2018/19 - 5:1, 3:0; 2019/20 - 2:2; 2020/21 - 6:1, 2:0; 2021/22 - 1:0, 8:0; 2022/23 - 4:0, 3:1; 2024/25 – 3:0, 3:2; 2025/26 - 0:0.
"Futbol+"in proqnozu: 50-30-20.
Hakimlər: RƏVAN HƏMZƏZADƏ, Teymur Teymurov, Şirmamed Mamedov, Cavid Cəlilov.
VAR hakimi: İnqilab Məmmədov.
VAR hakiminin köməkçisi: Kərim Zeynalov.
Hakim-inspektor: Ceyhun Haşımov.
AFFA nümayəndəsi: Zaur Hacıməhərrəmov.
Bakı, Tofiq Bəhramov adına Respublika stadionu. Saat 19.30.

Turun son matçının bazar ertəsinə salınması təsadüfi deyil. Heç şübhəsiz, bu qərar "Qarabağ"ın "Dinamo" ilə matçdan sonra yorğunluqdan xilas olması məqsədi ilə verilib. Həqiqətən də, "köhlən atlar" qısa müddətdə toparlanmalı və çempionluq uğrunda mübarizədə geri düşməməyə çalışmalıdı. Heyəti böyük ölçüdə yenilənən "köhlən atlar" daha bir mövsüm uğursuzluğa düçar olacağı halda, "Sabah"ın hegemonluğu möhkəmlənə, ağdamlılar üçün "qara zolaq" təhlükəsi böyüyə bilər. Burda əsas məsuliyyət Qurban Qurbanovun çiyinləri üzərindədi. Ayxan Abbasovla yolları ayırandan sonra Azər Bağırovla anlaşan "Şamaxı" isə daha yaxşısına nail olmalıdı.

Bu komandalar indiyə qədər 81 dəfə qarşılaşıb. Bunların 42-də "köhlən atlar", 13-də "şirlər" qələbə qazanıb. 26-da "sülh" qeydə alınıb. Topların nisbətində ağdamlılar öndədi - 117:47.

KƏNAN BAHADIR