"Neftçi" -"Sumqayıt" matçının 35-ci dəqiqəsində meydan sahiblərinin azarkeş qrupu "Neftçimaniya" söyüşə görə polislər tərəfindən tribunadan uzaqlaşdırıldı.

Football-plus.az xəbər verir ki, bu olayla bağlı daha detallı məlumat almaq üçün "ağ-qaralar"ın azarkeşlər üzrə əlaqələndiricisi Aqil Məmmədquliyevlə danışdıq:

"Mən həmin an stadionda olmamışdım. Sonradan məsələni aydınlaşdıranda bəlli oldu ki, adı çəkilən fanklub xoşagəlməz hərəkətlər edib və ifadələr səsləndirib. Biz matçdan bir neçə gün əvvəl də onlara müraciət edib ədəb-ərkana dəvət etmişdik".

Mövzu ilə bağlı "Neftçi"nin mətbuat katibi Rüstəm Allahverdiyevdən də açıqlama aldıq:

"Polislər "Neftçimaniya" azarkeş qrupuna qeyri-etik hərəkətlər və ifadələrə yol verməmələriylə bağlı xəbərdarlıq etdi. Lakin onlar məhəl qoymadı. Diktor da fanklub üzvlərinə müraciət etdi. Sonra polislər onları stadiondan uzaqlaşdırmağa başladı. Dedilər ki, xəbərdarlıqlara məhəl qoymayırlar.

Biz düzgün addım atmışıq. AFFA və PFL-in belə olaylarla bağlı rəsmi göstərişləri var. Orda qeyd olunur ki, azarkeş qrupları etikadan kənar hərəkətlər və təhqiramiz ifadələr işlədirsə, onlara xəbərdarlıq edilir. Xəbərdarlığa da laqeyd yanaşılırsa, polislər tərəfində stadiondan uzaqlaşdırılırlar. Klub rəsmiləri belə hallarda polisə mane olursa, onlar cərimələnir".

ABDULLA İSMAYILOĞLU