"Sabah" cavab görüşündə rəqib tərəfindən daha çox təzyiqə məruz qaldı. Riqa təmsilçisinin futbolçusunun qırmızı vərəqə alması qismən "bayquşlar"ın xeyrinə işlədi. Lakin latviyalılar risk edib yenə irəli atıldı. Masazır təmsilçisi həm avrokubokdakı təcrübəsizliyini, həm də rəqibin təzyiqini nəzərə alıb, ehtiyatlı oyuna üstünlük verdi. "Sabah" qol buraxdıqdan sonra sanki oyandı. Ona qədər azlıqda olan rəqibin qapısı ağzında epizodlar yaratsa da, yararlana bilməməklə yanaşı, rəqibə oynamağa da imkan vermişdi. Amma hesabı rəqib açandan sonra Murad Musayevin yetirmələri qol axtarışına çıxdı və əks-hücümlarla latviyalıları məyus etdi. “Sabah” mərhələni keçsə də, cavab görüşündə daha çox əziyyət çəkdiyini, həyəcan keçirdiyini düşünürəm. "Neftçi" ilk oyundan sərfəli nəticəylə qayıtmaqla yanaşı, rəqibi də yaxşı təhlil edə bilmişdi. Cavab görüşündə "ağ-qaralar" həm müdafiədə, həm də orta sahədə ağırlığını qoyub rəqibi neytrallaşdırdı. Yarımmüdafiənin mərkəzində Sayef, Eddi, Ozobiç daha yaxşı çıxış etdi.

Mərkəzdə üstünlükdən sonra cinahlardan sürətli hücumlarla rəqibə təzyiq göstərildi və bunun da nəticəsi gəldi. Ozobiçi bəzən nominal hücumçu kimi oynayırdı. Bunu düzgün saymıram. Əvvəla ona görə ki, onun hazırda yaşı çoxdu. “Milliləşdirilmiş” futbolçudan hücumun sivri ucunda faydalanmaq üçün gərək əvvəlki yaşlarına qayıtsın, bu da mümkün deyil. Xorvatiyalı mərkəzdə və hücumçuların arxasında daha effektlidi. Şəxsi fikirimi deyim ki, Boqomolski "Neftçi" səviyyəsində oyunçu deyil. Onu hələ də niyə komandada saxladıqlarını bilmirəm. Belaruslunun əvəzinə ən azı Ozobiç kimi daha bir təcrübəli oyunçu komandaya cəlb olunsa, daha yaxşı olar.

Hələ püşkatmada rəqiblərimiz bəlli olanda "Qəbələ"nin bəxti gətirməmişdi. Bunun bir neçə səbəbi var. Əvvəla "Omoniya" yetərincə avrokubok təcrübəsi olan komandadı və doğma publika qarşısında çox aqressiv və döyüşkəndi. İkinci, "Qəbələ" ötən mövsümün ardından əsas heyət oyunçularını itirmişdi, üçüncüsü, maliyyə sıxıntısına görə gedənlərin yeri doldurulmamışdı. Bu sadaladıqlarım "qırmızı-qaralar"ın Konfrans Liqasındakı uğursuzluğuna gətirib çıxardı. Düzdü, "Qəbələ" doğma meydanda döyüşdü, yaxşı qollar vurdu. Amma görünən odu ki, komanda hələ avrokubok oyunlarına hazır deyil. Elmar Baxşıyevin komandası ölkə çempionatında daha yaxşı çıxış etmək üçün heyətinə təcrübəli qapıçı qatmalıdı. Yenidən mükafatçılar sırasında düşmək istəyirsə, ən azı iki-üç səviyyəli futbolçu cəlb etməlidi".