“Sabah” səfərdəki ilk oyunda inamlı qələbə qazansa da, rəqib Bakıya iddialı gəlmişdi.

RFŞ-nin baş məşqçinin oyunöncəsi mətbuat konfransında “hələ heç nə bitməyib, sona qədər döyüşəcəyik” deməsi də oyunun ağır keçəcəyinə işarə idi. Həmçinin Viktor Morozun komandası meydana dəyişikliklərlə çıxmışdı. 

"Football-plus.az" xəbər verir ki, ilk dəqiqlərdə hər iki tərəf ehtiyatlı oynamağa çalışsa da, qonaqlar daha aqressiv idi.

Oyunda ilk qol vəziyyəti “bayquşlar"dan gəldi. Letiçdən ötürmə alan Mikelsin iti bucaq altından həmləsi uğursuz oldu. Riqa təmsilçisi buna İkaunieksin aşırma zərbəsiylə cavab versə də, top qapıdan yan keçdi. 34-cü dəqiqədə rəqib futbolçu Zyuzin Mikelsin ayağına zərbə endirdiyinə görə referi 2-ci “sarı” ilə onu meydandan qovdu. Say üstünlüyündən yaralanan "Sabah" daha kəsərli hücumlar qurmağa çalışdı. İsayev – Mikels - Till “üçlüy”ü rəqibi sürətli əks-hücumda yaxalasa da, sonuncu yüzfaizlik qol imkanını əldən verdi. Hissənin sonuna yazın İsayev - Volkov dueti müdafiəni yarmağı bacardı. Lakin gürcü futbolçunu  qapı önünə asmasını müdafiəçilər uzaqlaşdırdı.

2-ci hissəyə qonaqlar üstün başladı. Savalnieksin cərimə meydançasına  təhlükəli asmasını Yusif çıxardı, Mareşin təkrar zərbəsinə isə Çakla ayaq qoydu. Ümumiyyətlə, azlıqda qalan rəqibin “Sabah”ı meydanın özünə aid hissəsinə sıxışdırması təəccüb doğururdu.

Deyəsən, Murad Musayevin ehtiyatlı taktikası əndazəni aşmışdı. Qarşılıqlı hücumlarla davam edən oyunun 67-ci dəqiqəsində hesab açıldı. Saviçin cərimə meydançasına asmasını qəbul edən İkaunieks Yusifi məyus etdi. Qol "bayquşlar"ı ayıltdı və onlar hücumları artırmağa başladı. 71-ci dəqiqədə Apeh bir qədər reyd etdikdən sonra Mikelsi zərbə mövqeyinə çıxardı. Amma onun zərbəsindən sonra top dirəyə dəyib meydanı tərk etdi. Musayevin yetirmələri qol istəyinə 77-ci dəqiqədə çatdı. İrasabal uzun ötürməylə Apehi gördü, o, başla irəli şığıyan Mikelsə assistlik etdi. Sonuncu müdafiəçilərin başını gicəlləndirdikdən sonra topu tora göndərdi. Növbəti epizodda Nuriyev Apehi qapıçı ilə üzbəüz qoysa da, sonuncu dueldən qalib ayrıldı. Uzatma dəqiqələrində “Sabah” növbəti dəfə rəqibi əks-hücumda yaxaladı. Nuriyev reyd etdikdən sonra Apehi gördü. Legioner dəqiq zərbəylə oyunda son nöqtəni qoydu.

Gözdən qaçmadı 
* Oyunun startından əvvəl "Sabah" futbolçuları "Soldati Di Sabah" fanklublarını salamladı. 

* Zyuzin 2-ci “sarı”ya görə meydanı tərk edəndə rəqibin baş məşqçi Viktor Moroz referiyə kəskin şəkildə etiraz etdi. Ədalət təmsilçisinin sarı vərəqə ilə "mükafatlandırdığı” çalışdırıcısını hirsi soyumadı. Sonra referi baş məşqçiyə də qırmızı vərəqə göstərməyə ehtiyac duydu.

* 36-cı dəqiqədə Mareş İsayevə toxunaraq özünü yerə atdı. Bu zaman Seydiyevlə Oşs arasında gərginlik yarandı. Digər  futbolçular komanda yoldaşlarını sakitləşdirməyə çalışdılar. Hətta Murad Musayev də meydana daxil olaraq futbolçularını sakitləşməyə, təmkinli olmağa çağırdı. 

* 44-cü dəqiqədə azarkeşlər “şəhidlər ölməz, vətən bölünməz” şüarını səsləndirdi. 

* 2-ci hissədə də azarkeşlər stadiona gəlməkdəydi.
* Mikels bərabərlik qolunu vurandan sonra stadionda "Bakılı balasıyam" mahnısı səsləndirildi. 

* "Sabah" futbolçuları qələbəni azarkeşlərlə birgə qeyd etdi.