“Karolina” – “Veqas” finalı inanılmaz dramatik şəraitdə keçir. Hər oyunda qeyri-adi geridönüşlər, rekordlar və s. və i.a. Final seriyasının ilk oyununda “Veqas” qalib gəlmişdisə, ikincidə “Karolina” hesabı bərabərləşdirdi. Özü də meydan sahibləri sona 10 dəqiqə qalmış 0:2 uduzurdu. “Karolina” MHL tarixinə final seriyasının oyununda sona 10 dəqiqə qalmış iki şayba fərqi ilə geridə olduğu halda, qələbə qazanan 4-cü (son 82 ildə ilk) komanda kimi düşdü. Əvvəllər bunu yalnız “Monreal” (1944), “Toronto” (1936) və “Çikaqo” (1931) bacarmışdı.

Seriyanın bazar günü keçirilən 3-cü oyununda da maraqlı hadisələr baş verdi. Bəribaşdan vurğulayaq ki, “Veqas” seriyada 2-ci dəfə önə çıxdı. 3-cü period başlayarkən 0:4 uduzan “Karolina” hesabı bərabərləşdirə, oyunu overtayma daşıya bildi. Ancaq “Veqas” əlavə vaxtda, daha dəqiqi, 86-cı dəqiqənin 38-ci saniyəsində qələbə qolunu vurdu.

“Veqas”ın qələbəsində Mitç Marner 3 qol və 1 məhsuldar ötürmə ilə önəmli rol oynadı. 29 yaşlı kanadalı 2-ci periodda – 31, 35, 37-ci dəqiqələrdə üç qol vurdu. Bunun üçün ona cəmi 6 dəqiqə 10 saniyə lazım gəldi. Bu isə Stenli kubokunun final seriyası üçün yeni rekorddu. “Veqas”ın forvardı əfsanəvi Moris Rişarın 1957-ci ildə müəyyənləşdirdiyi rekordu yenilədi. Onda “Monreal”ın hücumçusu “Boston”la oyunda 6 dəqiqə 21 saniyə ərzində het-trik ermişdi.

Başqa komandalarla bağlı da maraqlı xəbərlər var. Menni Malhotra “Vankuver”in yeni baş məşqçisi təyin olunub. O, bu postda mayın 19-da istefaya göndərilən Adam Futu əvəz edib. Malhotra son iki mövsümdə “Vankuver”in farm-klubu olan “Abbotsford”u çalışdırıb. Adı çəkilən mütəxəssis 2020-24-cü illər aralığında “Toronto”da baş məşqçinin köməkçisi, ona qədər isə “Vankuver”də inkişaf üzrə köməkçi və baş məşqçinin köməkçisi vəzifələrində çalışıb. Malhotranın hokkeyçi karyerasına “Vankuver”, “Reyncers”, “Dallas”, “Kolambus”, “San-Xose”, “Kenaks”, “Karolina” və “Monreal” klublarının adı yazılıb.

final
5 iyun
Karolina - Veqas 4:3 OT (0:1, 0:1, 3:1, 1:0)
Seriyada hesab – 1:1.

7 iyun
Veqas – Karolina 5:4 OT (0:0, 4:0, 0:4, 1:0)
Seriyada hesab – 2:1.