Ötən həftə təmsilçilərimiz avrokubok oyunlarını keçirdi.

"Qarabağ" Çempionlar Liqasının 2-ci təsnifat mərhələsində "Rakuv"un qonağı oldu. "Sabah", "Qəbələ" və "Neftçi" isə Konfrans Liqasının 2-ci mərhələsindən mübarizəyə qoşuldu. Son çempion səfərdə gözlənilmədən məğlub oldu. "Bayquşlar" qapısını toxunulmaz saxlamaqla RFŞ-yə 2 qol vurub Bakıya qayıtdı. "Qəbələ" doğma meydanda “Omoniya”ya məğlub oldu. "Neftçi" isə Sarayevoda son dəqiqələrdə Rəhman Hacıyevin qoluyla "Jelezniçar"a şok yaşatdı. Növbəti həftə cavab oyunları keçiriləcək. Təmsilçilərimizin ilk oyundakı çıxışı və ümumilikdə şansları haqda Ağasəlim Mircavadovun fikirlərini öyrəndik.

Rakuv – Qarabağ 3:2
"Qarabağ" həmişə ilk mərhələlərdə çətinlik çəkir. Amma "Rakuv"la oyun göstərdi ki, komandada müdafiə və qapı xəttində ciddi problemlər və qarşılıqlı anlaşmazlıq var. Məhz bu üzdən "Qarabağ" qollar buraxdı. Şahruddin yenə eyni səhvləri etdi. Tənqid etməklə mən heç də onun zəif qolkiper olduğunu demək istəmirəm. Şahruddin işgüzarlığı ilə seçilir. Zərbələrə reaksiyası, cəldliyi, ayaqla oynaması üstünlükləridi. Amma çıxışlarda səhvi və hədsiz istəkli olması nöqsanlarıdı. Bəli, millimizin "1 nömrə"si məhz çox istəkli olmağın qurbanı olur. O, bunun üzərində çalışmalıdı. Adətən, qapı xəttində müdafiəçilərlə yaxşı əlaqə qurmağı bacaran və onların arxayın olduğu "əlcək sahibi”nə etimad göstərirlər. Yəni qapıda təcrübəli qolkiper olanda müdafiəçilər daha rahat oynayır. Ona görə də hər dəfə qapıda rotasiya etmək riskdi. Məhz buna görə Qurban Qurbanov Şahruddinə daha çox güvənir. Amma onun səhvləriylə bağlı ölçü götürülməlidi. Əminəm ki, Qurban müəllim də bunu yaxşı bilir. Təbii ki, Ramil Şeydayevlə Musa Qurbanlının komandanı tərk etməsinin də təsiri var. Kadi Borgesin hələ onlardan öncə Rusiyaya üz tutması "Qarabağ"da oyun quruculuğuna xeyli təsir etmişdi. Millimizin iki üzvünün də gedişi ən azı 2-3 ay özünü göstərəcək. Biz məşqçilər buna “pauza” deyirik. Amma "köhlən atlar"ın gücünə və avrokubok təcrübəsinə inanırıq. Polşa təmsilçisi keçilməz rəqib deyil. Onların da müdafiəsində ciddi boşluqlar var. Bunun nəticəsidi ki, 4 dəqiqəyə Cica onları iki dəfə məyus etdi. Bakıdakı oyunda Ağdam təmsilçisinin vinger və cinah müdafiəçilərinin üzərinə çox iş düşəcək. Məhz onların sürətli reydləri sayəsində "Rakuv"u məyus etmək olar. Təbii ki, "Qarabağ" öncəliklə qapısının toxunulmazlığını təmin etməlidi. İnanıram ki, cavab matçıda sevinən tərəf "köhlən atlar" olacaq.

RFŞ – Sabah 0:2
"Sabah" avrokuboklarda debüt edirdi. Ona görə də tam gücünü ortaya qoya bilmədi. RFŞ daha yaxşı çıxış etdi. Riqa təmsilçisi "Sabah"ı maksimum təzyiq altında saxladı. "Bayquşlar" isə müdafiəfə etibarlı oynamaqla əks-hücumlara bel bağlamışdı. Onların bu taktikası özünü doğrultdu. Murad Musayevin yetirmələri məhz əks-hücumdan qollar vurdu. Ümumilikdə "Sabah"ın ilk dəfə qitəmiqyaslı yarışlarda iştirak etdiyini nəzərə alsaq, pis çıxış etmədi. Amma Masazır təmsilçisi hələ istədiyi “rels”ə düşə bilməyib. Oynadıqca “artıracaqlar”. "Sabah" inanmıram ki, səfərdə qazandığı uğurlu nəticəni əlldən versin. Bakıda ehtiyatla oynamaqla mərhələ adlayacaqlar.

Qəbələ - Omoniya 2:3
"Qəbələ" əsas heyət üzvlərini itirməyin əziyyətini çəkdi. Yeni transferlər hələ komandaya tam uyğunlaşmayıb. Buna rəğmən, onlar alışdığımız şən, kreativ futbol oynadılar. Təbii ki, rəqib də avrokuboklarda yetərincə təcrübəsi olan "Omoniya"dı. Buna rəğmən, “qırılma nöqtəsi” hakimin penalti təyin etməsi oldu. Epizoda baxanda penaltiyə oxşamır. Düşünürəm ki, referi bölgə təmsilçisinə münasibətdə haqsızlıq etdi. Həmçinin Allaşın cərimə meydanşasında ayağına müdaxilə olsa da, hakimin fiti susdu. Amma "Qəbələ" döyüşdü. Elmar Baxşıyevin yetirmələri baxımlı qollar vurdu, rəqib isə standart vəziyyətlərdən fərqləndi. "Qəbələ" premyer-liqada yalnız doğma publika önündə yox, səfərdə də kreativ futbol sərgiləyir. Odu ki, onların hələ də mərhələ keçmək şansları var. Təbii ki, büdcədən də çox şey asılıdı. Necə deyərlər, keyfiyyətli oyunçu almaq üçün cibə baxmaq lazımdı. Məhdud büdcəyə malik "Qəbələ" istədiyi oyunçuları ala bilmir. Amma imkan olsaydı, "qırmızı-qaralar"a bir təcrübəli qapıçı lazımdı.

Jelezniçar – Neftçi 2:2
"Neftçi"nin səfərdən uğurlu nəticə ilə döndüyünü demək olar. Əslində "Jelezniçar" heç də fiziki cəhətdən üstün deyil. Rəqib, sadəcə, təmsilçimizin müdafiədəki boşluqlarından istifadə etməklə qollar vura bildi. "Ağ-qaralar" orta xətdə və hücumda daha yaxşı çıxış edir, top saxlayır, təzyiq göstərir. Amma müdafiədə ciddi problemləri var. Arxa xətdəki boşluqlarla bağlı tədbir görülməlidi. Mənim üçün qaranlıq qalan Ömər Buludovun yeni transfer, hazırlığı aşağı olan Koffi ilə əvəzlənməsi və ikincinin qısa müddətdə sıradan çıxması oldu. Amma "Neftçi"nin Bakıda daha baxımlı futbol sərgiləyərək mərhələ keçəcəyini düşünürəm. Rəhman Hacıyevin son dəqiqilərdə vurduğu qələbəyə bərabər qol cavab oyunu və növbəti mərhələyə keçmək üçün stimul olmalıdı.

ABDULLA İSMAYILOĞLU