“Deməzdim ki, Murad Musayev rəqibdən çəkinir. Peşəkar baş məşqçilər matçdan əvvəl, adətən, belə açıqlamalar verir. Burda məqsəd futbolçuları oyuna kökləməkdi. Həm də futbol adamları yaxşı bilir ki, hər an sürpriz baş verə bilər. UEFA-nın məşqçilərə keçdiyi təlimlərdə bu haqda informasiya verilir. Tövsiyə olunur ki, rəqibdən asılı olmayaraq, şanslar bərabər dəyərləndirilsin. Bu üzdən çalışdırıcılar güclü rəqib haqda danışarkən çatışmazlıqlarını, zəifdə isə üstün tərəflərini qabardır ki, balans yaransın. Musayev də bunu çox yaxşı bilir. Belə hallara Qurban Qurbanovun açıqlamalarında da tez-tez rast gəlmək mümkündü.

Digər tərəfdən, RFŞ-yə zəif rəqib deməzdim. Məncə, ilk oyunda məğlub olmasına baxmayaraq, “Sabah”la bərabər səviyyəli komandadı. Rəqibə təzyiq göstərməyi, qol vəziyyətləri yaratmağı bacarır. Murad Musayevin komandası qələbəni asanlıqla qazanmadı. Düşünürəm ki, axşamkı oyunda masazırlıların növbəti mərhələyə keçmək şansı 65 faizdi. Çox güman, “Sabah” daha çox qapını toxunulmaz saxlamağa üstünlük verəcək. Çalışdırıcının hücum futbolu ilə ümumi hesabı təhlükəyə atacağını zənn etmirəm. Qarşılaşmanın heç-heçə (0:0) bitməsi ehtimalı daha yüksəkdi”.

“Qəbələ”ni çox çətin oyun gözləyir. Kiprlilərin daha üstün olduğunu ilk matçda gördük. Düzdü, Elmar Baxşıyevin futbolçuları gözləniləndən yaxşı performans sərgilədi. Buna baxmayaraq, “Omoniya” meydanda hegemonluğu ələ almışdı. Düşünün ki, rəqib indi ikiqat güclü çıxış edəcək. Bilirsiz ki, Kiprdə türklərə qarşı aqresivlik var. Bu amil azarkeş dəstəyində ciddi artıma səbəb olacaq. Digər tərəfdən, baş məşqçi “Qəbələ”nin oyun tərzini yaxşı mənimsəyib. Futbolçuların da daha ciddi çıxış edəcəyi bəllidi. “Qəbələ”nin yeni transferlərinin hələ tam uyğunlaşmadığını da nəzərə almalıyıq. Bəs bizimkilərin çıxış yolu nədi? Məncə, “Omoniya” hücum futbolu oynayacaq. “Qırmızı-qaralar” müdafiədə yaranacaq boşluqlardan məharətlə istifadə etməlidilər. Məhz bu qarşılaşmanın nəticəsi üçün narahatam”.