"Qəbələ"dən başlayaq. Püşkatmadan sonra, demək olar, bütün mütəxəssislər bölgə təmsilçisinin mərhələ keçmək şansının olduqca az olduğunu bildirdi. Mən də onlarla həmrəyəm. Qəbələdəki ilk oyunda "qırmızı-qaralar" məğlub olsalar da, yaxşı oynadılar. Lakin səfərdəki darmadağın çox şeydən xəbər verir. Elmar Baxşıyev də deyirsə ki, rəqib layiqli qələbə qazandı, deməli, "Qəbələ" avrokuboka hazır deyildi. İnanaq ki, "Qəbələ" bundan sonra çempionaya yaxşı köklənəcək. "Neftçi" ilə "Sabah" qələbə qazanaraq mərhələ adlasa da, "ağ-qaralar"ın daha yaxşı mübarizə apardığını düşünürəm. Adrian Mutunun yetirmələri "Jelezniçar"a Bakıda göz açmağa imkan vermədi.

Düşünürəm ki, "Neftçi" bir qədər də «artırsa», «Beşiktaş"ı da keçə bilər. Çünki Türkiyə təmsilçisi heç də əvvəlki üstün vəziyyətdə deyil. "Sabah" hər iki oyunda qalib gəlsə də, üstün oyun keçirdiyini düşünmürəm. RFŞ bu iki oyunda oyun planında "bayquşlar"ı üstələdi. Hətta sizi inandırım ki, latviyalılar "Bank Respublika Arena"da azlıqda qalmayıb qolu ilk hissədə vursaydı, "Sabah"a daha çox başağrısı olacaqdı. Bəlkə onda başqa nəticəyə şahidlik edəcəkdik. Unutmayaq ki, rəqib ötən il Konfrans Liqasının qrupunda oynayıb. RFŞ 10 nəfərlə cəsarət edib açıq futbol oynayıb hesabı açsa da, 11 nəfərlə daha güclü çıxış edəcəkdi. "Sabah" qoldan sonra özünə gəldi və tədricən üstünlüyü ələ alıb qollar vurdu. Amma Murad Musayevin yetirmələri son nöqtəni qoymaqda çətinlik çəkirlər. Çünki başqa qol imkanları da vardı. Növbəti rəqib «Partizan"dı, Serbiyanın köklü klublarından biri. "Sabah" Latviya təmsilçisinə qarşı sərgilədiyi oyuna sadiq qalsa, "Partizan"la çox çətin olacaq. Hər iki komandamıza uğurlar arzulayıram".