Yoldaşlıq oyununda San Marinoyla qarşılaşan millimiz 2:1 hesablı qələbə qazandı.

Şübhəsiz, bu qələbə baş məşqçi Ayxan Abbasov başda olmaqla heç birimizi qane edə bilməz. Çünki rəqib San Marino idi və bu yığma üzərində yalnız böyükhesablı qələbə məmnunluq hissi yarada bilərdi. Bəli, milli Maltaya qarşı matçda olduğu kimi, bu dəfə də 1 nömrə kimi çıxış etməyə çalışdı. Lakin etiraf edək ki, xüsusən ilk 20 dəqiqədə komandalardan bərabərsəviyyəli oyun izlədik. Düzü, elə yekun da belə oldu.

Ümumi durumu öyrənmək üçün statistikaya nəzər salsaq, görərik ki, San Marino da bizimkilər qədər – 10 dəfə qapıya zərbə vurub. Bəs, biz niyə bu dəfə də hücumları qolla tamamlaya bilmədik? Çünki oyun ərzində həlledici zərbələri endirən Bədavi Hüseynov, Toral Bayramov, Rəhman Daşdəmirov, Elvin Cəfərquliyev, Rüfət Abbasov, Emin Mahmudov, Ayxan Hüseynov, Renat Dadaşov və Səbuhi Abdullazadə kimi təcrübəli oyunçular dəqiq oynamadı. Mahir Emreliylə Nəriman Axundzadə, ümumiyyətlə, bizi sevindirmək niyyətindən uzaq idi.

İndi çox narahatıq. Çünki Millətlər Liqasından əvvəl sonuncu toplanışı keçirən yığmamız hansısa ümid vəd etmədi. Əlbəttə, Maltaya uduzan, San Marinonu böyük çətinliklə məğlub edən komandanın Litva və Lixtenşteyn ilə oyunlarda nə ilə yadda qalacağını təxmin etmək çətindi. Üstəlik, bu komandaların San Marinodan daha güclü olduğuna şübhə yoxdu. Görünür, Ayxan Abbasov həyəcan təbili çalmalı, hadisələrin axarını dəyişməyin vacib olduğunun fərqinə varmalıdı.

KƏNAN BAHADIR