Elvin Cəfərquliyev... “Qarabağ”ın baş məşqçisi Qurban Qurbanov onu əvəzedici komandaya sürgün edənə qədər ən yaxşı azərbaycanlı futbolçu ünvanına sahib idi. Özü də təkcə gözəyarı qiymətləndirmələrlə deyil, “Futbol+”in hər il keçirdiyi nominasiya üzrə futbol ictimaiyyəti tərəfindən bu ada layiq görülmüşdü. Etiraf edək ki, həmin sorğunun nəticəsi tam ədalətliydi. Elvin həqiqətən də 2025-ci ildə möhtəşəm, hətta çəkinmədən qeyd edə bilərik ki, qüsursuz çıxışla yadda qalmışdı. İstər “Qarabağ”da, istərsə də millidə. Müdafiəçinin 2026-cı ilə də uğurla start verdiyini vurğulamalıyıq. Cari ildə Çempionlar Liqasının əsas mərhələsində “Ayntraxt”, “Liverpul” və “Nyukasl”a qarşı oyunlarda forma geyən futbolçu premyer-liqada 10, ölkə kubokunda 2 matç keçirdi. Əlbəttə, Elvinin əsas komandadan uzaqlaşdırılmasının həmin oyunlarla bağlı olmadığını bilirik. Xoşagəlməz hadisə Elvinin istirahət vaxtını düzgün dəyərləndirməməsiylə bağlıdı. Hər halda, necə deyərlər, köhnə dəftərləri vərəqləmək heç kimə, eləcə də bizə fayda verməyəcək. Axı bu mövzuya dəfələrlə toxunmuşuq. İndi ancaq və ancaq gələcəyə, Elvinin karyerasını harda davam etdirəcəyinə köklənmək lazımdı. Çünki “Qarabağ”ın, daha dəqiqi, Qurban Qurbanovun onu bağışlamayacağı bəllidi.
Bəs, futbolçu hazırda nə ilə məşğuldu? Danışıq apardığı klublar varmı? Xatırlayırsızsa, Elvinin meneceri Tural Əsgərli bir neçə həftə əvvəl qəzetimizə açıqlamasında Cəfərquliyev üçün rəsmi təklif olmadığını bildirmiş, ancaq onun legioner həyatı yaşamaqda maraqlı olduğunu dilə gətirmişdi. Millinin Avstriya toplanışının başa çatdığını, “Qarabağın srağagün təlim-məşq toplanışına başladığını nəzərə alıb, yenidən Tural bəyə müracət etdik və bu dəfə də eyni cavabı eşitdik: “Mövcud vəziyyətdə dəyişiklik yoxdu. Elvin üçün hələ də hansısa klubdan rəsmi təklif alınmayıb. Bəli, millinin toplanışı sona çatıb. Amma onsuz da Qurban Qurbanov yığmada çıxış edən futbolçulara istirahət üçün vaxt verib. Bu üzdən “Qarabağ”ın Elvin olmadan təlim-məşq toplanışına start verməsində qəribə nəsə yoxdu”.
Xatırladaq ki, “köhlən atlar”ın Elvinlə müqaviləsinin müddəti gələn ilin yayında başa çatacaq.
KƏNAN BAHADIR