Səudiyyə Ərəbistanına yollanmaq üzrə olan ulduz futbolçulardan birinin – “Liverpul”lu Fabinyonun transferində problem yaranıb.

"Football-plus.az" xəbər verir ki, Braziliya yığmasının üzvü artıq “Əl-İttihad”la 3 illik anlaşma əldə edib. Ərəblər “Liverpul”a 40 milyon funt sterlinq təzminat ödəyəcək. Fabinyo bu üzdən Almaniyada toplanışda olan “qırmızılar”ın düşərgəsində deyil. Hamı tezliklə bu keçidin bitəcəyini gözlədiyi bir vaxtda ortaya qəribə problem çıxıb. Məsələ burasındadı ki, it həvəskarı olan 29 yaşlı yarımmüdafiəçinin fransız buldoqu cinsli itləri var. Səudiyyə Ərəbistanında isə bu cins itlər çox aqressiv və təhlükəli sayılır. Bu üzdən onların ölkə ərazisinə gətirilməsi qadağandı!

Yaranmış qeyri-adi vəziyyətdən çıxış yolu tapmaq üçün “Əl-İttihad” rəhbərliyi Səudiyyə Ərəbistanı hökumətinə ağız açmalı olub. Onlar xüsusi olaraq Fabinyonun itlərinin ölkəyə buraxılmasını xahiş ediblər. Başqa variantlar da müzakirə olunur. Bir variant da odu ki, itlər Səudiyyə Ərəbistanı ilə həmsərhəd olan Bəhreyndə saxlanılsın. Həmin ölkədə bu itlər qadağan deyil. “Əl-İttihad” fanatları sosial şəbəkədə “Fabinyonun itlərini ölkəyə buraxın” şüarı ilə xüsusi kampaniyaya start verib. Maraqlıdı ki, deyilənə görə, bəzi heyvanların ölkəyə gətirilməsi ilə bağlı mövcud olan qadağa üzündən adı açıqlanmayan daha bir futbolçunun Səudiyyə Əərbistanına transferi yubanır.

Qeyd edək ki, Fabinyo “Liverpul”a 2018-ci ildə “Monako”dan gəlib. Bu müddət ərzində o, 219 rəsmi oyuna çıxaraq 11 qol vurub, eləcə də biri ÇL və biri premyer-liqa olmaqla 7 titul qazanıb.