“Neftçi” iyulun 18-də, yəni ötən həftənin şənbə günü azarkeşləri ilə görüş keçirdi.

Komandanın məşq proqramına uyğun şəkildə təşkil olunan, “Palms Sports Arena”da baş tutan tədbirdə media nümayəndələri də iştirak etdi. Görüşün məqsədi tərəfdarların yeni transferlərlə tanış olması, futbolçularla ünsiyyət qurması və komandaya dəstək göstərmələri idi. Futbol dili ilə desək, tədbir bu baxımdan məshuldar alındı. Ancaq görüşdən əvvəl klubun baş icraçı direktoru Cenk Sümər və baş məşqçisi Yuri Vernidubun iştirakıyla brifinq keçirildi. Daha sonra çıxış edən Vernidub əvvəlcə hazırlıq prosesini dəyərləndirdi, ardından jurnalistlərin suallarını cavabladı.

Media nümayəndələrinin məlumatlandırılmasından sonra növbə azarkeşlərə çatdı. Media sektoruna daxil olduqda “Forza Neftçi”nin daimi sakini olduğu oturacaqlarda təxminən 500 tərəfdar gördük. Stadionda 100-ə qədər sıravi azarkeş də var idi. Beləliklə, məşq prosesinə start verildi. Həmin anlar əvvəldən sonadək azarkeşlərin bəstələri, şüarları ilə müşayiət olundu. Tərəfdarlar “ağ-qaralar”ın yetirmələrindən olan Aslan Şirinovla kapitan Emin Mahmudova xüsusi dəstək göstərdi, adlarını səsləndirdilər. Məşq çərçivəsində yoxlama oyunu da keçirildi. 8 nəfərlik iki komandaya bölünən futbolçular sarı və qırmızı formalar geyərək meydana çıxdı. Matç “sarılar”ın qələbəsi ilə başa çatdı və bu heyətin xatirə şəkli çəkildi. Sonda baş məşqçi Yuri Vernidub və futbolçular “Forza Neftçi”nin önünə çıxdı. Fanklub üzvlərindən biri irəli gələrək Emin Mahmudova xitabən komandaya uğurlar arzuladı, fubolçulara inandıqlarını, daim yanlarında olacaqlarını bildirdikdən sonra azarkeşlərin çempionluq tələbini dilə gətirdi. Ardından pirotexniki vasitələrdən istifadə edən azarkeşlər stadiona tüstüyə qərq etdi.

Futbolçuların məşqi bitirəndən sonra avtobusa əyləşməsi izdihamla qarşılandı. Düzdü, bütün futbolçular qısa müddətdə nəqliyyat vasitəsində yerini tuta bildi. Lakin Emin Mahmudov avtobusu mühasirəyə alan azarkeşləri gördükdə yerə düşdü və hər biriylə şəkil çəkdirməyə başladı. Kapitan əlil tərəfdarlara xüsusi diqqət ayırdı, stajlı azarkeşlərlə qısa söhbət etdi, azyaşlı tərəfdarların gətirdikləri formaları imzaladı. Nəhayət, avtobusun “Palms Sports Arena”nı tərk etməsinin ardından tərəfdarlar da stadiondan ayrılmağa başladı.

KƏNAN BAHADIR