Təəssüf ki, ölkəmizin köklü klublarından olan “Kəpəz”lə bağlı son illərdə hər mövsümün əvvəlində olduğu kimi, bu dəfə də ciddi narahatlıqlar var. Çünki yeni”futbol ili”nin başlanmasına bir aydan az vaxt qalsa da, komanda cəmi bir futbolçu – Rojerio Santos ilə güclənib. Ayrılıqların sayı isə daha çoxdu: kollektiv 8 oyunçu ilə vidalaşıb.

Düzdü, düşərgədən verilən məlumatlara görə, baxışda xeyli sayda futbolçu var. Ancaq yeni müqavilələrin imzalanmaması, klubun maliyyə durumunun ürəkaçan səviyyədə olmaması kimi məqamlar tərəfdarların haqlı narahatlığına səbəb olur. Odu ki, komandanın cari durumu, heyətin komplektləşdirilməsi yönündə işlərin qaydasında olub-olmaması və başqa mövzular ilə bağlı bilgi almaq üçün “sarı-göylər”in baş məşqçisi Azər Məmmədovla söhbətləşdik.

– “Kəpəz”də ilk cəhdiniz uğurlu alınmamışdı. 12 oyunda cəmi 1 qələbə qazana bilmişdiz. Bu dəfə uğurlu olacağınıza inanırsızmı? Sizi hansı məqamlar “Kəpəz”ə yenidən cəlb etdi?
– 2023-cü ildə ilk “5-lik”də olan komandalardan xal almağı bacarmışdıq. Lakin müxtəlif səbəblərdən uzun müddət işləmək imkanı olmadı. Amma bu, mənim üçün artıq geridə qalan mərhələdi. Bu gün yalnız qarşıdakı işləri düşünürəm. Uğurlu nəticələr qazanmaq üçün əlimizdən gələni edəcəyik.

– Heyətdə konkret hansı mövqelərdə boşluqlar var? Daha neçə transfer planlaşdırılır? Maliyyə problemləri futbolçu seçimində nə dərəcədə çətinlik yaradır?
– Təbii ki, bəzi mövqelərdə güclənməyə ehtiyac var. Əsasən də hücum xəttində. Transfer danışıqları davam edir. Məqsəd, sadəcə, say artırmaq deyil, komandaya keyfiyyət qatacaq futbolçular cəlb etməkdi. Yerli oyunçularla yanaşı, legionerləri də diqqətdə saxlayırıq. Büdcə məsələsinə gəlincə, rəhbərliklə daim əlaqədəyik və imkanlar çərçivəsində ən düzgün seçimləri etməyə çalışırıq. Hazırda transfer prosesində ciddi problem görmürəm.

– Onda bu yöndə hadisələrin axarı haqda məlumat verə bilərsiz?
– Seleksiya prosesi davam edir. Hər gün futbolçuları yaxından izləyirik. Tələblərə cavab verən oyunçuları müəyyənləşdirməyə çalışırıq. Tələsmək istəmirik, çünki səhv transfer etməkdənsə, bir az səbr edib, doğru seçim etmək daha vacibdi. Hazırda heyətə bir neçə futbolçunun cəlb olunması planlaşdırılır. Amma yekun rəqəm transfer bazarındakı vəziyyətdən və aparılan danışıqlardan asılı olacaq.

– “Kəpəz” yeni mövsümdə Gəncə şəhər stadionunda, onminlərlə azarkeş önündə meydana çıxacaq. Bəllidi ki, həddən artıq təzyiq olacaq. Özünüzü həmin anlara hazır hiss edirsizmi? Ümumiyyətlə, tərəfdarların sizə münasibəti necədi?
– Mən bunu təzyiq yox, böyük məsuliyyət kimi qəbul edirəm. Gəncə futbol şəhəridi və burda azarkeşlər komandalarını çox sevir. Onların komandadan gözləntilərinin yüksək olması təbiidi. Mən də, futbolçular da bunun fərqindəyik. Azarkeşlərin dəstəyini hiss etmək həmişə xoşdu. İndiyədək mənə göstərilən münasibətə görə hər kəsə təşəkkür edirəm. İnanıram ki, yaxşı oyun və nəticələr olduqca bu dəstək daha da artacaq.

– Maraqlıdı ki, təyinatınızdan bir aya yaxın vaxt keçsə də, köməkçiləriniz hələ açıqlanmayıb. İddialara inansaq, məşqçilər heyətində Kərim Diniyev, Etibar İbrahimov, Fərid Məmmədov kimi adlar var…
– Məşqçilər korpusu ilə bağlı işlər yekunlaşmaq üzrədi. İşləyəcəyim komanda məlumdu. Klub yaxın günlərdə bu barədə ictimaiyyətə ətraflı məlumat verəcək.

– “Kəpəz”dən ayrılan sabiq futbolçulardan birini – Rojerio Santosu yenidən transfer etdiz. Bu proses davam edə bilərmi? Yoxsa daha çox yeni simalara üstünlük veriləcək?
– Bizim üçün əsas meyar futbolçunun adı deyil, hazırkı vəziyyəti və komandaya nə qədər faydalı ola bilməsidi. Əvvəllər “Kəpəzdə çıxış etmiş futbolçu komandamıza kömək edəcəksə, qayıtması mümkündü. Eyni zamanda, yeni simalara da açığıq. Məqsədimiz keçmişə yox, gələcəyə hesablanmış, rəqabətədavamlı kollektiv formalaşdırmaqdı.

KƏNAN BAHADIR