Mauro İkardini gözləyə-gözləyə hücumçusuz qalan və ciddi problemlə üzləşən ''Qalatasaray'' hələ də transferdə çox passivdi.

"Football-plus.az" xəbər verir ki, 4 nəhəng arasında yeni oyunçu almayan yeganə klub olan ''Cim-Bom'' yalnız ötən qış icarə əsasında heyətinə qatdığı Kaan Ayhanı 2,8 milyon avroya daimi əsasda transfer etməklə kifayətlənib. Halbuki artıq iyunun 27-də komandanı Çempionlar Liqasının 2-ci təsnifat mərhələsinin ilk oyunu gözləyir. Bir çox hücumçu ilə maraqlanan İstanbul nəhəngi indi də diqqətini uzun illərdi İngiltərədə çıxış edən futbolçuya yönəldib. Söhbət ''West Hem''in təcrübəli forvardı Maykl Antoniodan gedir. 33 yaşlı İngiltərə əsilli yamaykalı forvard ötən mövsüm 48 rəsmi oyunda 14 qol, 5 məhsuldar ötürmə ilə fərqlənib. Antonio indiyə qədər İngiltərədən başqa ölkədə oynamayıb və 8 mövsümdü, ''Vest Hem''in şərəfini qoruyur. London klubu 2015-ci ildə onu 9,5 milyon avroya ''Nottingem Forest''dən heyətinə qatıb. Antonio indiyə qədər ''çəkicdöyənlər''in heyətində 276 rəsmi oyunda 75 qol, 43 məhsuldar ötürməlik performans sərgiləyib. ''Qalatasaray'' rəhbərliyi Antonionun meneceri ilə danışıqlar aparır.

Onu da bildirək ki, ''Aslan'' iyulun 5-də Acun Ilıcalının sahibi olduğu ''Hall Siti'' ilə yoxlama oyunu keçirəcək. Oyun Kocaelidə baş tutacaq. Futbolsevərlərin satışa çıxarılan biletlərə böyük maraq göstərdiyini nəzərə alsaq, görüşün dolu tribunalar önündə keçiriləcəyi gözlənilir.