Önəmli transferlər həyata keçirməsinə rəğmən, mərkəz hücumçusu almadığına görə tənqid atəşinə tutulan ''Fənərbaxça'' diqqətini Mişi Batşuayiyə yönəldib.

"Football-plus.az" xəbər verir ki, müqavilə ilə ''Çelsi''yə məxsus olan təcrübəli forvard ötən mövsümü icarə əsasında ''Beşiktaş''da keçirmiş və ümidləri dogrultmamışdı. London klubunun planlarına daxil olmayan hücumçu ''Fənər''dən təklif alıb.

"Valensiya''lı Maksi Lopeslə anlaşa bilməyən və ''Leyptsiq''li Aleksander Sörlotu Türkiyəyə gəlməyə razı sala bilməyən İstanbul nəhəngi diqqətini Batşuayiyə yönəldib. Özü də Batşuayi ''Çelsi'' ilə müqaviləsinin son ilinə daxil olduğundan ''zadəganlar''ın tələbləri heç də sərt deyil. Komanda icarə haqqı tələb etmir. Bundan başqa, ''Çelsi'' Batşuayinin 4 milyon avroya bərabər olan illik məvacibinin 1 milyon avrosunu ödəməyə hazırdı. Yəni ''Fənər'' belçikalıya illik 3 milyon avroluq məvacib ödəməyə razılıq versə, bu transferin qarşısında heç bir maneə qalmayacaq. Batşuayi ümidləri doğrultsa, ''Fənər'' ona yeni müqavilə də təklif edə bilər. Çünki 28 yaşlı oyunçu gələn yay azad agent statusunda olacaq. Türkiyə mətbuatının yazdığına inansaq, ''sarı-lacivərdlilər'' futbolçuya illik 2,5 milyon avro təklif edib. Danışıqlar davam edir. Batşuayinin ötən mövsüm ''Beşiktaş''da 42 rəsmi oyunda 14 qol, 5 məhsuldar ötürmə ilə yadda qaldığını bildirək.